საქართველოს ენერგეტიკის განვითარების ფონდი ქვეყნის სხვადასხვა რეგიონში შვიდი ჰიდროელექტროსადგურის მშენებლობას გეგმავს. ჰესების ჯამური დადგმული სიმძლავრე 180 მეგავატს შეადგენს, ხოლო პროექტების საერთო საინვესტიციო ღირებულება 300 მლნ აშშ დოლარით განისაზღვრება.

კომპანიასა და ბანკს შორის ურთიერთთანამშრომლობის შესახებ გაფორმებული მემორანდუმის თანახმად, პირველ ეტაპზე (12-14 თვე) „საქართველოს ბანკის" თანადაფინანსებით აღნიშნული ჰესების ტექნიკურ-ეკონომიკური შესწავლა განხორციელდება, რაც ჰიდროლოგიურ, გეოლოგიურ, გარემოზე ზემოქმედების, ეკონომიკურ და ადგილობრივი სოციალური ეფექტის დეტალურ შეფასებას გულისხმობს. მემორანდუმით, ამ ფაზაზე დაფინანსების წყაროებში „საქართველოს ბანკის" წილი 85 პროცენტია, ხოლო GEDF-ის თანამონაწილეობა - 15 პროცენტი.

პირველი ეტაპის დასრულების შემდეგ, მიღებული შედეგებიდან გამომდინარე იგეგმება ყველა ეკონიმიკურად მომგებიანი ჰესის მშენებლობა, რომელიც დააკმაყოფილებს საქართველოს კანონმდებლობით განსაზღვრულ და მსგავსი პროექტებისთვის მსოფლიოში მიღებულ გარემოს დაცვისა და სოციალური ზემოქმედების სტანდარტებს. ჰესების მშენებლობა ძირითადად უცხოური ინვესტიციებით განხორციელდება, რომელსაც „საქართველოს ბანკი" და GEDF-ი ერთობლივად მოიზიდავენ.

აღსანიშნავია, რომ ამ პროექტების წინასწარი ტექნიკურ-ეკონომიკური შეფასების დოკუმენტები აშშ-ის საერთაშორისო განვითარების სააგენტოს (USAID) დაფინანსებით უკვე მომზადდა.