სპორტის აკადემიის სტადიონზე საქართველოს ფინანსთა სამინისტროს ჩემპიონატი მინიფეხბურთში MOF-2013 დაიწყო , რომელსაც ფინანსთა მინისტრი ნოდარ ხადური დაესწრო.
ჩემპიონატში მონაწილეობენ როგორც ფინანსთა სამინისტროს საქვეუწყებო დაწესებულებები, ისე საჯარო სამართლის იურიდიული პირები. ,,19 ივლისს ფინალია და იმედია, სამინისტროს ეყოლება ღირსეული ჩემპიონი. ვფიქრობ, მნიშვნელოვანია, თანამშრომელთა როგორც შრომითი პოტენციალის გამოყენება, ისე მათ ჯანმრთელობაზე ზრუნვა და მათი შეკავშირება. იმედია, როგორც მოთამაშეებისთვის, ისე გულშემატკივარისთვის საინტერესო ტურნირი იქნება," - განაცხადა ფინანსთა მინისტრმა ნოდარ ხადურმა.
სპორტის აკადემიის სტადიონზე, ერთმანეთს შეხვდნენ ფინანსთა სამინისტროს მომსახურების სააგენტოსა და ფინანსთა სამინისტროს საფინანსო-ანალიტიკური სამსახურის გუნდები. თამაში დასრულდა ანგარიშით 6:1 შემოსავლების სამსახურის ცენტრალური აპარატისა და შემოსავლების სამსახურის საბაჟო დეპარტამენტის გუნდების მატჩი კი ფრედ 1:1
ბომბარდირთა დავაში 3 გოლით ლიდერობს საფინანსო-ანალიტიკური სამსახურის გუნდის ფეხბურთელი გურამ ოთარაშვილი.
დღეს, 9 ივლისს, ერთმანეთს დაუპირისპირდებიან ფინანსთა სამინისტროს ცენტრალური აპარატისა და შემოსავლების სამსახურის მომსახურების დეპარტამენტის გუნდები, ასევე შემოსავლების სამსახურის მონიტორინგის დეპარტამენტისა და აუდიტის დეპარტამენტის გუნდები.
