ქუთაისის საერთაშორისო აეროპორტი ნელ-ნელა ქვეყნის მთავარი ტურისტული აეროპორტი ხდება, აღნიშნულის შესახებ განცხადება ტურიზმის ეროვნული ადმინისტრაციის ხელმძღვანელმა გიორგი სიგუამ გააკეთა. სიგუას განმარტებით, ქუთაისის დავით აღმაშენებლის სახელობის აეროპორტი ადგილმდებარეობის გათვალისწინებით თანდათან უფრო იტვირთება და სულ მალე ქუთაისიდან კიევის, დონეცკის, ხარკოვისა ვარშავას გარდა ფრენები დუბაის მიმართულებითაც შესრულდება.
„იცით რომ რამდენიმე დღის წინ ჩვენ მივიღეთ მონაწილეობა ქუთაისი-ხარკოვის ახალი რეისის გაშვებაში, რომელსაც ავიაკომპანია „WIZZ AIR"-ი ასრულებს. „WIZZ AIR"-ი ავიარეისებს კვირაში 2 ჯერ შეასრულებს და ბილეთის საშუალო ფასი 50 დოლარი იქნება. გარდა ამისა, „WIZZ AIR"-ი დაამატებს კიდევ 3 რეისს დონეცკის მიმართულებით. ასე რომ ქუთაისის საერთაშორისო აეროპორტი ნელ-ნელა ხდება ქვეყნის მთავარი ტურისტული აეროპორტი, თავისი ადგილმდებარეობიდან გამომდინარე. ქუთაისის საერთაშორისო აეროპორტიდან უკვე სრულდება ფრენები კიევის, დონეცკის, ხარკოვის ვარშავას, მოსკოვის მიმართულებით. აღსანიშნავია, რომ „WIZZ AIR"-ი დუბაის მიმართულებით ფრენების დამატებასაც გეგმავს"- აღნიშნა სიგუამ.
ტურიზმის ეროვნული ადმინისტრაციის ხელმძღვანელის თქმით, ქუთაისი კიდევ იმითაც არის საინტერესო, რომ იმერეთი ეტაპობრივად ხდება ტურისტულად ძალიან მიმზიდველი რეგიონი.
„ჩვენ მოვამზადეთ რეგიონის განვითარების სტრატეგია, რომელის მიზანიც არის ის, რომ 2020 წელს იმერეთმა 2 მილიონი ტურისტის მიღება შეძლოს"- განმარტა სიგუამ.
შეგახსენებთ, რომ 1-ელი ივლისს ცენტრალური და აღმოსავლეთ ევროპის უმსხვილესმა დაბალბიუჯეტიანმა ავიაკომპანიამ „WIZZ AIR"-მა დავით აღმაშენებლის სახელობის ქუთაისის საერთაშორისო აეროპორტში ხარკოვის მიმართულებით რეისების განხორციელება დაიწყო.
ავიაკომპანია „WIZZ AIR" საქართველოს ავიაბაზარზე 2012 წლის 27 სექტემბრიდან ოპერირებს.
