იუსტიციის სამინისტრო არასრულწლოვანთა მართლმსაჯულების კოდექსის შექმნაზე მუშაობს, ამის შესახებ საქართველოს იუსტიციის მინისტრმა თეა წულუკიანმა ბრიუსელის მაღალი წარმომადგენლობითი დონის კონფერენციაზე ისაუბრა, რომელიც არასრულწლოვანთა მართლმსაჯულების საკითხებს მიეძღვნა.
თეა წულუკიანმა თავის გამოსვლაში იმ საქმიანობის შესახებ ისაუბრა, რომელსაც იუსტიციის სამინისტრო კანონთან პრობლემის მქონე არასრულწლოვანებთან მიმართებაში სხვადასხვა საერთაშორისო ორგანიზაციის დახმარებით ახორციელებს, კერძოდ, პრევენციის, განრიდების, მედიაციის, უფროსი მეგობრის, ლიდერთა სახლის, რესოციალიზაცია-რეაბილიტაციის პროგრამებზე და სხვ. ამას გარდა, მინისტრი კონფერენციის დელეგატებს იუსტიციის სამინისტროს ახალი და მნიშვნელოვანი ინიციატივის შესახებ ესაუბრა.
თეა წულუკიანის განცხადებით, საქართველოსთვის დღეს მნიშვნელოვან პრიორიტეტს წარმოადგენს არასრულწლოვანთა სპეციალური კოდექსის შექმნა, რომელიც თავის თავში გააერთიანებს სისხლის სამართლის, მატერიალურ და საპროცესო ნორმებს.
„ამ ინიციატივის მიზანია, „UNICEF"-სა და ევროკავშირთან თანამშრომლობით საქართველოში შეიქმნას ევროპული სტანდარტის არასრულწლოვანთა მართლმსაჯულების სისტემა, რომელიც დაფუძნებული იქნება გაეროს ბავშვთა უფლებების დაცვის პრინციპებზე. ბავშვები თავიანთი ფიზიკური და ფსიქოლოგიური განვითარებით განსხვავდებიან ზრდასრული ადამიანებისაგან. სამართლის სისტემა, რამდენადაც ეს შესაძლებელია, უნდა ითვალისწინებდეს მათ „განსხვავებულობას". ეს კოდექსი თავის თავში გააერთიანებს საპროცესო და აღსრულების ნაწილებს და, რაც მთავარია, კოდექსში იქნება დათქმა, რომ არასრულწლოვანთა საქმეებზე იმ პროფესიონალებმა იმუშაონ, ვინც იცის კანონთან პრობლემების მქონე ბავშვებთან მუშაობა", - განაცხადა თეა წულუკიანმა.
მინისტრის თქმით, საქართველოს იუსტიციის სამინისტრო, საერთაშორისო ორგანიზაციებთან თანამშრომლობით, წაიყვანს ამ რეფორმას, რომლის დასრულების შემდეგაც ქვეყანას არასრულწლოვანთათვის თანმიმდევრული და დახვეწილი კოდექსი ექნება.
მაღალი წარმომადგენლობითი დონის კონფერენციას ევროპის კომისიამ და „UNICEF"-ის ცენტრალური და აღმოსავლეთ ევროპის რეგიონულმა ოფისმა ბრიუსელში 27-28 ივნისს უმასპინძლა. მასში მონაწილეობა მიიღეს ევროპისა და ცენტრალური აზიის ქვეყნების მთავრობის წევრებმა, საკანონმდებლო ხელისუფლების, ადამიანის უფლებათა დაცვის ინსტიტუტების წარმომადგენლებმა. კონფერენციას 100-მდე დელეგატი დაესწრო.
„არასრულწლოვანთა მართლმსაჯულების რეფორმის ხელშეწყობისა და გაძლიერების ერთობლივი პროექტი ევროპის კომისიამ („დემოკრატიისა და ადამიანის უფლებების ევროპული ინსტრუმენტის" (EIDHR) ფარგლებში) და გაეროს ბავშვთა ფონდმა (UNICEF) ცენტრალური და აღმოსავლეთ ევროპის, აგრეთვე, დსთ-ის ქვეყნებში 2011 წლიდან დაიწყეს. პროექტი საკანონმდებლო ბაზის დახვეწას, რეფორმას, შესაბამისი უწყებების შესაძლებლობების განვითარებას გულისხმობს.
კონფერენციის მიზანს წარმოადგენდა პროექტის ფარგლებში მონაწილე ქვეყნების შესაძლებლობების განვითარების ხელშეწყობა, რათა რეგიონულ და ეროვნულ დონეზე დროულად იქნეს უზრუნველყოფილი არასრულწლოვანთა მართლმსაჯულების რეფორმა; წვლილი შეიტანოს არასრულწლოვანებისთვის სამართლიანი მართლმსაჯულების ხელმისაწვდომობის გაუმჯობესებაში.
იუსტიციის მინისტრთან ერთად კონფერენციის მუშაობაში, რომელიც დღეს დაიხურა, მონაწილეობა მიიღო მინისტრის მოადგილე ალექსანდრე ბარამიძემ.
