ქართულ ავიაბაზარს მალე ძველი, თუმც ბაზრიდან გაძევებული მოთამაშე დაუბრუნდება. როგორც სააგენტო „ჯი-ეიჩ-ენს" ავიაკომპანია „საქართველოს საერთაშორისო ავიახაზებიდან" აცნობეს, კომპანიამ ფრენების განახლებაზე სამოქალაქო ავიაციის სააგენტოდან პირველადი ნებართვა უკვე მიიღო. საბოლოო ნებართვის მიღების შემდეგ ფრენებს რამდენიმე მიმართულებით დაიწყებს. კომპანიაში იმედოვნებენ, რომ 15 ივლისიდან ჩარტერულ ფრენებს განახორციელებენ ანტალიისა და ეგვიპტის მიმართულებით, ხოლო 10 აგვისტოდან „საქართველოს საერთაშორისო ავიახაზები" გერმანიის - ფრანკფურტისა და კიოლნის მიმართულებითაც იფრენს. წლის ბოლომდე კი ავიაკომპანია ფრენებს დაიწყებს მოსკოვის, ლვოვის, კიევის და ვილნიუსის მიმართულებით.
კომპანიაში აცხადებენ, რომ წლის ბოლომდე დაგეგმილია ასევე ავიარეისების დაწყება ინდოეთის - დელის, ირანის - თეირანის, თებრიზის, ყაზახეთის - აქტაუსა და ყირგიზეთის - ბიშკეკის მიმართულებით. მათივე ინფორმაციით, ფრენების დაწყება გადაწყვეტილია ავღანეთის, კერძოდ, ქაბულის მიმართულებით.
„ავიაკომპანიის ეკიპაჟი, ტექნიკური პერსონალი და სპეციალისტები არაუგვიანეს 5 ივლისისა იქნებიან გერმანიის ქალაქ სარბრუკენში, საიდანაც მოხდება საჰაერო ხომალდის თბილისში გადმოფრენა! აგრეთვე ავიაკომპანია ელოდება, პირველად საქართველოში ბორტგამცილებელთა სწავლების ნებართვას"- განმარტავს „საქართველოს საერთაშორისო ავიახაზების" გენერალური დირექტორი ჯემალ ხახუტაიშვილი.
როგორც ცნობილია Georgian International Airlines-მა ოპერირება 2004 წელს დაიწყო, თუმც 2010 წელს სამოქალაქო ავიაციის სააგენტომ მას ფრენების უფლება ჩამოართვა. როგორც კომპანიაში აცხადებენ, ფრენების გაუქმება მაშინ უკანონოდ მოხდა და სწორედ ამიტომ ავიაკომპანია სააგენტოს მაშინდელ ხელმძღვანელობას სასამართლოში უჩივის.
