საერთაშორისო მისიამ საქართველოს სტატისტიკური სისტემის გლობალური შეფასების ანგარიში გამოაქვეყნა. როგორც „საქსტატში" განმარტავენ, გლობალური შეფასების მიზანია „საქსტატის" მიერ წარმოებული ოფიციალური სტატისტიკის ეროვნული სისტემის შესაბამისობის შეფასება ევროპულ სტანდარტებთან, გაეროს ფუნდამენტურ პრინციპებთან, ევროპის სტატისტიკური პრაქტიკის კოდექსთან, ასევე ევროსტატის სტატისტიკურ მოთხოვნებთან. გლობალური შეფასება მიზნად ისახავს საქართველოს სტატისტიკის ეროვნული სამსახურის გაუმჯობესების ხელშეწყობას და საქართველოს სტატისტიკის სისტემის საერთაშორისო და ევროპულ რეკომენდაციებსა და საუკეთესო პრაქტიკასთან შესაბამისობაში მოყვანას.
„საერთაშორისო მისიის შეფასება არის საკმაოდ პოზიტიური. მისია ხაზს უსვამს „საქსტატის" თანამშრომლობის მაღალ კვალიფიკაციას. მისიას დადებითი განწყობა აქვს ასევე სამომავლო ხედვებთან დაკავშირებით. ანგარიშის მიხედვით, პოზიტიურადაა შეფასებული ჩვენი კანონმდებლობა, რაც წინგადადგმული ნაბიჯი იყო ჯერ კიდევ 2009 წელს, როდესაც შესაბამისი კანონი იქნა მიღებული. თუმცა იმისათვის, რომ დავუახლოვდეთ ევროტანდარტებს მთელი რიგი საკანონმდებლო ცვლილებები და რეფორმებია გასატარებელი.
მნიშვნელოვანია მაგალითად კვლევების აუცილებლობის საკითხი, ასევე „საქსტატის" დამოუკიდებლობასა და ინსტიტუციონალურ მოწყობასთან დაკავშირებული თემები. ასევე „საქსტატის" აღმასრულებელი დირექტორისა და საბჭოს წევრების არჩევასთან დაკავშირებით"- განაცხადა „საქსტატის" აღმასრულებელმა დირექტორმა ზაზა ჭელიძემ.
აღსანიშნავია, რომ მოხსენებაში ჩამოყალიბებული რეკომენდაციები შესაძლებელია შემდეგნაირად დაჯგუფდეს: სამართლებრივი და ინსტიტუციური გარემო; მეთოდოლოგია, რეგისტრები და კლასიფიკატორები; ინფორმაციული ტექნოლოგიები; ადამიანური რესურსები; მონაცემების გავრცელება და მომხმარებლებთან კომუნიკაცია.
