საქართველოს ფინანსთა მინისტრი ნოდარ ხადური ქ. ქუთაისში, ქალაქის ახლადარჩეულ მერს, დიმიტრი კოპალიანს შეხვდა. ქუთაისის მერმა ფინანსთა მინისტრს გააცნო ქალაქში არსებული პრობლემები. ძირითადად, საუბარი შეეხო ინფრასტრუქტურული პროექტების მიმდინარეობას, წყალგაყვანილობის სისტემის სამშენებლო-სარეაბილიტაციო სამუშაოებს, ქუთაისში დაგეგმილი ახალი ნაგავსაყრელის მშენებლობის საკითხებს. შეხვედრაზე შეთანხმდნენ, რომ ქუთაისის მერია აქტიურად ითანამშრომლებს ცენტრალურ ხელისუფლებასთან ქალაქისთვის პრიორიტეტული საკითხების მოსაგვარებლად.
„შეხვედრაზე ვისაუბრეთ იმ ახალ პროექტებზეც, რომლის განხორციელებასაც გეგმავს ქალაქის ახალი ხელისუფლება. ჩვენ, რეგიონული განვითარებისა და ინფრასტრუქტურის სამინისტროსთან ერთად, მზად ვართ აქტიურად ვითანამშრომლოთ იმისთვის, რათა ქ.ქუთაისის ინფრასტრუქტურა შეესაბამებოდეს თანამედროვე სტანდარტებს და ხელი შევუწყოთ რეგიონის სოციალურ-ეკონომიკური მდგომარეობას გაუმჯობესებას," - განაცხადა ფინანსთა მინისტრმა ნოდარ ხადურმა.
დღესვე, ფინანსთა მინისტრმა და ქუთაისის მერმა ავტომაგისტრალის ქუთაისის შემოვლითი გზის 17 კმ-იანი მონაკვეთის მშენებლობის მიმდინარეობა დაათვალიერეს.
