დღეს, გარემოსა და ბუნებრივი რესურსების დაცვის სამინისტროში კავკასიის ბუნების ფონდის (CNF) ხელმძღვანელმა დევიდ მორისონმა, დაცული ტერიტორიების სააგენტოს თავმჯდომარემ რატი ჯაფარიძემ და პროკრედიტ ბანკის გენერალურმა დირექტორმა საშა ტერნესმა საგრანტო ხელშეკრულებას მოაწერეს ხელი. ხელმოწერილი მემორანდუმის თანახმად, პროკრედიტ ბანკი კავკასიის ბუნების ფონდისთვის გამოყოფს თანხას, რომელიც ლაგოდეხის დაცული ტერიტორიების ადმინისტრაციული ხარჯების დაფინანსებას მოხმარდება.
პროკრედიტ ბანკი უკვე მესამე წელია თანამშრომლობს დაცული ტერიტორიების სააგენტოსა და კავკასიის ბუნების ფონდთან, რის შედეგადაც დაცულ ტერიტორიებზე განხორციელდა რამდენიმე პროექტი. გარდა ფინანსური მხარდაჭერისა, ამ წლების მანძილზე, პროკრედიტ ბანკის ინიციატივით ლაგოდეხის ნაკრძალში სხვადასხვა სახის ეკოლგოგიური ღონისძიება ჩატარდა.
ბანკმა დევიზით „გმადლობთ, რომ გიყვართ ბუნება და იცავთ სისუფთავეს!" ლაგოდეხის სახელმწიფო ნაკრძალს 60 ნაგვის ურნა გადასცა. ასევე ბანკის თანამშრომლებმა, ჟურნალისტებთან ერთად, ნაკრძალის დასუფთავება, მოგვიანებით კი გზის სავალი ნაწილის მარკირება მოახდინეს.
„როგორც სოციალური პასუხისმგებლობის მქონე ფინანსური ინსტიტუტი, პროკრედიტ ბანკი აქტიურად გააგრძელებს მსგავსი ღონისძიებებისა და პროექტების განხორციელებას! გარემოზე ზრუნვა, არა მხოლოდ ზოგადად ბანკისათვის, არამედ მისი თითოეული თანამშრომლისათვის უაღრესად მნიშვნელოვანია" - განაცხადა პროკრედიტ ბანკის გენერალურმა დირექტრმა ბატონმა საშა ტერნესმა.
