უწყვეტი კონსულტაციების რეჟიმი და თანამშრომლობის გაუმჯობესების მიზნით, საქმიანი ურთიერთობა ბიზნესთან - ასეთია შემოსავლების სამსახურის საქმიანობის ერთ-ერთი პრიორიტეტი.
ამ ფორმატში, 12 ივნისს, სასტუმროში „რადისონ ბლუ ივერია" საქართველოს ფინანსთა სამინისტროს სსიპ შემოსავლების სამსახურისა და საქართველოს ბიზნეს ასოციაციის ინიციატივით, შეხვედრა გაიმართა ბიზნეს ასოციაციის წევრებთან, რომელსაც დაესწრო საქართველოს ფინანსთა მინისტრი ნოდარ ხადური. შეხვედრაში მონაწილეობა მიიღეს შემოსავლების სამსახურის უფროსმა ლაშა ხუციშვილმა, ფინანსთა სამინისტროსა და შემოსავლების სამსახურის წარმომადგენლებმა.
„ჩვენთვის ძალიან მნიშვნელოვანია ბიზნესთან მუდმივი კომუნიკაცია, ამიტომ ყოველთვის მზად ვართ ბიზნესს მივაწოდოთ ახალი ინფორმაცია. იცით, რომ მზადდება ცვლილებები საგადასახადო კოდექსში, მკაცრდება ფიტოსანიტარული ნორმები საბაჟოზე იმისთვის, რათა საქართველოს ბაზარი დაცული იყოს უხარისხო პროდუქციის შემოტანისგან. ასევე, გვაინტერესებს, რა პრობლემები აქვს ბიზნესსექტორს, რათა ერთობლივად ვიმუშაოთ მათი მოგვარებისთვის," - განაცხადა ფინანსთა მინისტრმა ნოდარ ხადურმა.
შეხვედრის მონაწილეები გაეცნენ საქართველოს საგადასახადო სისტემაში მიმდინარე პროცესებს, საგადასახადო პოლიტიკის ძირითად მიმართულებებს, სიახლეებს, რომლებიც ქვეყნის ბიუჯეტისა და გადასახადების გადამხდელთა ინტერესების გათვალისწინებით ინერგება საგადასახადო სფეროში.
ერთ-ერთი ასეთი სიახლე გადასახადების გადამხდელთა მომსახურების გაუმჯობესებისა და სერვისების გამარტივების მიზნით, შემოსავლების სამსახურის ვებ-გვერდის განახლებაა.
შემოსავლების სამსახურმა ელექტრონულ მომსახურებაში რამდენიმე აქტუალური სერვისი შეიმუშავა, რომლის პრეზენტაცია შეხვედრაზე შემოსავლების სამსახურის საინფორმაციო ტექნოლოგიების ცენტრის წარმომადგენლებმა გამართეს.
ერთ-ერთი სიახლეა „მომხმარებლის მართვა - ნდობით აღჭურვილი პირები", რომელიც საწარმოებსა და ორგანიზაციებს საგადასახადო ორგანოსთან ურთიერთობის კიდევ უფრო მოქნილ ფორმას სთავაზობს. მომხმარებელი „ნდობით აღჭურვილი პირის" შესახებ ინფორმაციას განათავსებს ელექტრონული მომხმარებლის გვერდზე და მიანიჭებს მას კონკრეტულ სერვისზე დაშვების სტანდარტულ ან ინდივიდუალურ უფლებებს.
ვებ-გვერდის განახლების შედეგად, გადასახადის გადამხდელისათვის ხელმისაწვდომი ხდება შემოსავლების სამსახურის ერთიან მონაცემთა ბაზაში მის შესახებ არსებული ინფორმაციაც, მათ შორის, წარდგენილი დეკლარაციები, მის სახელზე რეგისტრირებული სალარო აპარატები, ნებართვები, საბაჟო ოპერაციები და ა.შ.
შეხვედრა დიალოგის რეჟიმში გაგრძელდა, განიხილეს ბიზნესისათვის საინტერესო მიმდინარე საკითხები.
