ფინანსთა მინისტრი, ნოდარ ხადური შეხვდა მსოფლიოში ერთ-ერთი უმსხვილესი დამოუკიდებელი საფინანსო საკონსულტაციო ჯგუფის „ROTHSCHILD"-ის წარმომადგენლებს.
საქართველოში სამუშაო ვიზიტად ჩამოსულ დელეგაციას ხელმძღვანელობდა საკონსულტაციო ჯგუფის მთავარი აღმასრულებელი დირექტორი ალესანდრო დაფინა. შეხვედრას ასევე ესწრებოდა სან მარინოს რესპუბლიკის ელჩი ბრუნო მარი.

„ROTHSCHILD"-ის საფინანსო საკონსულტაციო ჯგუფს როგორც კერძო, ისე სახელმწიფო სექტორთან ურთიერთობის მდიდარი გამოცდილება აქვს. დღეს ჯგუფი მსოფლიოს 40 სახელმწიფოში მუშაობს, მათ შორის, 11 ქვეყანაში როგორც მთავრობის ფინანსური მრჩეველი. მათი ინტერესის სფეროა ფინანსური სექტორი, კერძო კაპიტალის, აქტივების მართვა, პირდაპირი ინვესტიციები და სხვა.
ფინანსთა მინისტრთან გამართულ შეხვედრაზე საკონსულტაციო ჯგუფის წევრებმა გამოთქვეს სურვილი, დაიწყონ საქმიანობა საქართველოში, გამოცდილება გაუზიარონ და დახმარება გაუწიონ როგორც საქართველოს ხელისუფლებას, ისე ქართულ ბიზნესს.

ფინანსთა მინისტრმა ნოდარ ხადურმა სტუმრებს გააცნო ქვეყნის ეკონომიკაში მიმდინარე პროცესები, საინვესტიციო და ბიზნეს გარემო და იმედი გამოთქვა, რომ შეხვედრა საკონსულტაციო ჯგუფის წარმომადგენლებს დაეხმარებათ მეტი ინფორმაცია მიიღონ საქართველოს შესახებ.