ფინანსთა მინისტრის უკვე ყოფილ მოადგილეს დავით ებრალიძეს პოსტზე დროებით, ნოდარ ხადურის სხვა მოადგილე - დავით ლეჟავა ცვლის. როგორც ფინანსთა მინისტრმა განაცხადა, დავით ლეჟავას კომპეტენციები არსებულ მოადგილეებზე გადანაწილდა, რაც დროებითი პროცესია. ნოდარ ხადური ამ დროისათვის დავით ებრალიძის შეცვლელის შესაძლო ვინაობას არ აკონკრეტებს.
შეგახსენებთ, რომ 30 მაისს ფინანსთა მინისტრის უკვე ყოფილმა მოადგილემ დავით ებრალიძემ თანამდებობის დატოვების შესახებ ინფორმაცია სოციალური ქსელის მეშვეობით გაავრცელა. თანამდებობიდან წასვლისს მიზეზად დავით ებრალიძე დავების საბჭოს ახალ პრინციპებზე შეუთანხმებლობა დაასახელა. მოგვიანებით, ებრალიძის მიერ საქართველოს ფინანსთა მინისტრის მოადგილის თანამდებობიდან წასვლის შესახებ განცხადება ფინანსთა სამინისტრომაც გაავრცელა.
"სამწუხაროდ, დავით ებრალიძემ სამუშაო პროცესში გამოთქმული ალტერნატიული მოსაზრებები ჩათვალა მისი პრინციპული მოსაზრებების საწინააღმდეგოდ და მიიღო გადაწყვეტილება თანამდებობიდან წასვლის შესახებ.
საქართველოს ფინანსთა მინისტრი დაეთანხმა მის პირად განცხადებას გათავისუფლების შესახებ. დავით ებრალიძე, როგორც მინისტრის მოადგილე - საპარლამენტო მდივანი, კურირებდა საგადასახადო პოლიტიკის მიმართულებას და იყო დავების განხილვის საბჭოს თავმჯდომარის მოადგილე.
საქართველოს ფინანსთა სამინისტრო აცხადებს, რომ რეფორმების მიმდინარეობა არ არის დამოკიდებული ერთ რომელიმე, თუნდაც, მაღალი რანგის თანამდებობის პირზე. რეფორმები არის საქართველოს მთავრობის საქმიანობის ძირითადი კურსი და სამინისტროში, ისე როგორც ყველა სხვა მიმართულებით, გაგრძელდება რეფორმები, რომელიც ითვალისწინებს საგადასახადო კანონმდებლობის შემდგომ ლიბერალიზაციას და დახვეწას, ასევე, დავების განხილვის საბჭოს ეფექტიანი მუშაობის უზრუნველყოფას, რათა ხელი შეუწყოს საინვესტიციო გარემოს სრულყოფას და გადამხდელთა უფლებების დაცვას", -ნათქვამი იყო ფინანსთა სამინიტროს განცხადებაში.
