სასმელ-სამკურნალო და ჩამოსასხმელ მიწისქვეშა მინერალურ წყლებზე, ბორჯომსა და ნაბეღლავზე მოსაკრებლის კანონით დადგენილი ოდენობები 3-ჯერ იზრდება. აღნიშნული ცვლილება „ბუნებრივი რესურსებით სარგებლობისთვის მოსაკრებლების შესახებ" საქართველოს კანონში შედის, რომელიც დღეს საფინანსო-საბიუჯეტო კომიტეტის სხდომაზე პირველი მოსმენით განიხილეს.
მომხსენებლის, ეკონომიკისა და მდგრადი განვითარების მინისტრის მოადგილის, ნათია მიქელაძის განმარტებით, მიწისქვეშა წყლები, როგორც ბუნებრივი რესურსი, ამოწურვად რესურსს წარმოადგენს. „აღნიშნული მინერალური წყლები საკმაოდ დიდი მოთხოვნით და კონკურენტუნარიანობით გამოირჩევა როგორც საქართველოს, ისე საერთაშორისო ბაზრებზე. ამიტომ მნიშვნელოვანია, მათი მოპოვებისთვის განსაზღვრული იქნას ისეთი მოსაკრებელი, რომელიც ადეკვატური და სამართლიანი იქნება მის ღირებულებასა და მოთხოვნასთან მიმართებაში", - განაცხადა ნათია მიქელაძემ.
საქართველოს მთავრობის ინიციატივით წარმოდგენილი კანონპროექტის მიხედვით, ბორჯომის მინერალური წყლისთვის დადგენილი მოსაკრებელი 1 კუბურ მეტრზე 10-ის ნაცვლად 30 ლარით, ხოლო ნაბეღლავის 6-ის ნაცვლად 18 ლარით განისაზღვრა. მომხსენებლის ინფორმაციით, მოსაკრებლის გაზრდა ბორჯომის და ჩოხატაურის მუნიციპალიტეტების ბიუჯეტის შემოსავლებს მნიშვნელოვნად გაზრდის, რაც თავის მხრივ, აღნიშული რაიონების განვითარებას და განსაზღვრული პრიორიტეტების განხორციელებას მოხმარდება.