ფინანსთა მინისტრი „საერთაშორისო გამჭირვალობა - საქართველოს" სარჩელზე, თბილისის საქალაქო სასამართლოს მიერ მიღებულ გადაწყვეტილებას ეხმიანება. ნოდარ ხადურის განმარტებით, უწყება აღნიშნულ სარჩელზე სასამართლოს მოტივაციას სწავლობს.
„ამჟამად, ფინანსთა სამინისტრო სწავლობს თბილისის საქალაქო სასამართლოს მოტივაციას აღნიშნულ სარჩელზე და შესაბამისად, ჩვენი მხრიდან გადაწყვეტილებები უახლოეს დღეებში იქნება მიღებული და ეცნობება საზოგადოებას. გვაქვს სამოქმედო სცენარები, ამავე დროს, ფინანსთა სამინისტრო განაგრძობს მუშაობას იმ მიმართულებით, რომ მაქსიმალურად ვუზრუნველყოთ ის ამოცენები, რომელიც თავის დროზე ჰქონდა სამინისტროს - ესაა ბიზნესის ხელშეწყობა და ბაზრის დაცვა კონტრაბანდული საქონლისგან," - განაცხადა ფინანსთა მინისტრმა ნოდარ ხადურმა. როგორც ცნობილია, თბილისის საქალაქო სასამართლომ „საერთაშორისო გამჭირვალობა - საქართველოს" სარჩელი დააკმაყოფილა.
ორგანიზაცია ფინანსთა მინისტრის, ნოდარ ხადურის მიერ 2013 წლის 25 იანვარს გამოცემული #30 ბრძანების გაუქმებას ითხოვდა. როგორც ცნობილია, ამ ბრძანებით დადგენილმა ახალმა რეგულაციებმა საქონლის გადაზიდვის საქმიანობით დაკავებულ მცირე და საშუალო მეწარმეებს სერიოზული პრობლემები შეუქმნა და მონოპოლიურ მდგომარეობაში ჩააყენა „საქართველოს ფოსტა".
"გადაწყვეტილება ჯერ კანონიერ ძალაში არ არის შესული. სასამართლოს გადაწყვეტილების გასასაჩივრებლად ფინანსთა სამინისტროს მისი გაცნობიდან 14 კალენდარული დღე აქვს. თუ ფინანსთა სამინისტრო არ მიმართავს სააპელაციო სასამართლოს, 2013 წლის იანვარში შესული რეგულაციები ავტომატურად გაბათილდება და დაზარალებულ მეწარმეებს მიეცემათ შესაძლებლობა დაბრუნდნენ ბაზარზე"- განმარტავენ "საერთაშორისო გამჭვირვალობა-საქართველოში".
