აბორტის აკრძალვით ვერანაირად უკეთეს შედეგს ვერ მივიღებთ, პირიქით მას ექნება მხოლოდ უკუშედეგი, - აცხადებს სააგენტო "ჯი-ეიჩ-ენთან" საუბარში მედიცინის დოქტორი, საინფორმაციო სამედიცინო-ფსიქოლოგიური ცენტრის „თანადგომის" თავმჯდომარე სერგო ჩიხლაძე. მისი თქმით, აბორტის აკრძალვა გამოიწვევს იმას, რომ მოხდება მათი გადანაცვლება იატაკქვეშეთში და კრიმინალური აბორტების რიცხვი მნიშვნელოვნად გაიზრდება.
"მოიმატებს „ბინაზე" გაკეთებული აბორტების რიცხვი, ექიმბაშების მიერ დანიშნული „მუცლის მოშლის" საშუალებების დალევა და ა.შ. რაც გამოიწვევს უამრავ გართულებას: სიხლდენებს, ინფექციებს და რაც მთავარია, მოიმატებს ქალთა სიკვდილიანობა. აბორტის აკრძალვის პრაქტიკა მრავალმა ქვეყანამ სცადა და საბოლოოდ უარი თქვეს, რადგან მხოლოდ უარყოფითი შედეგები გამოიღო. საყოველთაოდ ცნობილია, თუ რა მაღალია ქალთა სიკვდილიანობა ისეთ ქვეყნებში, სადაც მკაცრი კანონმდებლობაა აბორტთან მიმართებაში, მაგალითად ბოლივიაში, ბანგლადეშში ან ავღანეთში. არ მგონია, რომ ეს ქვეყნები არიან ეტალონები, რომელზეც სწორება უნდა მოვახდინოთ. ამ თემაზე სერიოზული დისკუსიის დაწყებაც კი გაუმართლებელია, საზოგადოებრივი ჯანდაცვის ინტერესებიდან გამომდინარე და ალბათ, უფრო უკავშირდება გარკვეულ პოლიტიკურ სპეკულაციებს.
აბორტს აქვს მრავალი გამომწვევი მიზეზი, როგორიცაა მოსახლეობის განათლების დაბალი დონე რეპროდუქციულ საკითხებზე და კერძოდ, ოჯახის დაგეგმვის მეთოდებზე, კონტრაცეპტივებზე დაბალი ხელმისაწვდომობა, მძიმე სოციალურ-ეკონომიური ფონი და სხვა. უმჯობესია, ვებრძოლოთ ამ მიზეზებს და ამით შევამციროთ აბორტების რიცხვი. ის, რომ აბორტი დიდი ბოროტებაა ამაზე ყველა ვთანხმდებით, მაგრამ ნუ დავემსგავსებით შუა საუკუნეების დროინდელ სახელმწიფოს, სადაც არ ითვალისწინებენ წლების განმავლობაში დაგროვებულ გამოცდილებას, მეცნიერულ კვლევების შედეგებსა და სფეროში მომუშავე სპეციალისტების კომპეტენტურ აზრს", - განაცხადა "ჯი-ეიჩ-ენთან" საუბარში სერგო ჩიხლაძემ