ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ალექსი პეტრიაშვილმა ევროპის კვირეულს გახსნა. კვირეულის გახსნასთან ერთად ეროვნულ ბიბლიოთეკაში ესეების, ფოტოებისა და ნახატების კონკურსში გამარჯვებულ ნაშრომთა დაჯილდოება და ფოტოებისა და ნახატების გამოფენა გაიმართა. ღონისძიებას განათლებისა და მეცნიერების მინისტრის მოადგილე დავით ზურაბიშვილი და ევროკავშირის წარმომადგენლობის ხელმძღვანელი ფილიპ დიმიტროვი ესწრებოდნენ.
ევროპის კვირეული 11 მაისამდე გაგრძელდება, მის ფარგლებში თბილისში და საქართველოს სხვადასხვა რეგიონში დაგეგმილია: შეხვედრები სტუდენტებთან და პროფესორ-მასწავლებლებთან, ნახატების, ფოტოებისა და ესეების კონკურსში გამარჯვებულთა დაჯილდოვება, ნახატების გამოფენა, მარათონული გარბენი და გამწვანების აქცია.
ევროპის კვირეული ნატოსა და ევროკავშირის შესახებ საინფორმაციო ცენტრის ორგანიზებით და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის მხარდაჭერით იმართება. კვირეულის ფარგლებში დაგეგმილია სხვადასხვა ღონისძიება, რომელშიც მონაწილეობას მიიღებენ სამთავრობო და არასამთავრობო სექტორის, დიპლომატიური კორპუსის წარმომადგენლები, მოსწავლეები, სტუდენტები და აკადემიური წრეების წარმომადგენლები.
ევროპის დღეები საქართველოში ტრადიციულად, მაისში, ევროპის დღის აღსანიშნავად ეწყობა, თუმცა წელს პირველად კვირეულს ნატოსა და ევროკავშირის შესახებ საინფორმაციო ცენტრი აწყობს. 9 მაისს, ევროპის კავშირს 52 წელი შეუსრულდება. ევროკავშირი 27 სახელმწიფოს პოლიტიკური და ეკონომიკური გაერთიანებაა (1 ივნისიდან მას შეუერთდება ხორვატია), რომელიც მიზნად ისახავს მშვიდობის, კეთილდღეობისა და თავისუფლების უზრუნველყოფას მისი 500 მილიონი მოქალაქისთვის.
