პარიზში ქართველებისგან შემდგარი 20-კაციანი კრიმინალური დაჯგუფება დააკავეს. ინფორმაციას ევროპოლისა და ინტერპოლის ბიუროები ავრცელებენ. ჯგუფთან ერთად დაკავებულია მათი ორგანიზატორი საქართველოს მოქალაქე, რომელსაც ამ დრომდე შვედეთის ხელისუფლება ციხიდან გაქცევის ბრალდებით ეძებდა.
დაკავებულთა გვარები ამ დრომდე არ ხმაურდება, თუმცა ცნობილია, რომ სამართალდამცველები მათ ბრალს პარიზსა და მის შემოგარენში ათეულობით ბინის ძარცვასა და დაყაჩაღებაში სდებენ.
ოფიციალურ განცხადებაში ნათქვამია, რომ მათი ამოცნობა ინტერპოლის ბაზაში არსებული თითის ანაბეჭდებით მოხდა, მონაცემთა გაცვლა მოხდა ინტერპოლის საქართველოს ეროვნულ ბიუროსთანაც.
მოხდება თუ არა დაკავებულების ექსტრადირება, თუ მათ ადგილზე გაასამართლებენ, ამას სასამართლო გადაწყვეტს. შინაგან საქმეთა სამინისტროსა და საკონსულოში, ქართული კრიმინალური დაჯგუფების დაკავებასთან დაკავშირებით, ამ დრომდე კომენტარს არ აკეთებენ.