გერმანიის ფედერაციული რესპუბლიკის ელჩი, ორთვინ ჰენიგი 2013 წლის 7 მაისს ბოლნისს ეწვევა, რათა მიიღოს ინფორმაცია ბოლნისის მუნიციპალიტეტის გეგმების შესახებ ქალაქის ყოფილი გერმანული დასახლების ნაწილის რეაბილიტაციასთან დაკავშირებით. ელჩს თან ახლდება საქართველოს კულტურული მემკვიდრეობის ეროვნული სააგენტოს გენერალური დირექტორი, მერაბ ბოჭოიძე, კულტურის სამინისტროს კულტურული მემკვიდრეობის განყოფილების უფროსი, ბესო მაცაბერიძე და სამხრეთ კავკასიაში გერმანული კულტურული მემკვიდრეობის დაცვის კავშირის დამფუძნებლები. ბოლნისის გამგებელთან, ლევან ფალავანდიშვილთან შეხვედრის გარდა, დელეგაცია მოინახულებს ბოლნისში გერმანული ინვესტიციით აშენებულ სასტუმრო-რესტორანს "გერმანული წისქვილი". პირველი გერმანელი ემიგრანტები ვიურტემბერგიდან თბილისში 1917 წლის 21 სექტემბერს ჩამოვიდნენ.
შემდეგ წლებში საქართველოში მათ დაარსეს გერმანული დასახლებები ალექსანდერდორფი, თბილისის კოლონია, მარიენფელდი, როზენბერგი, ელისაბეტფელდი, კატარინენფელდი და პეტერსდორფი.
მე-19 საუკუნის დასაწყისში სამხრეთ კავკასიაში 12.000 გერმანელი ცხოვრობდა. მათი უმეტესობა სოფლის მეურნეობით, ღვინის წარმოებითა და ხელოსნობით იყო დაკავებული. ბოლნისი საქართველოში ყველაზე დიდი გერმანული სოფელი იყო. 2013 წლის 7 მაისს გაიმართება სამხრეთ კავკასიაში გერმანული კულტურული მემკვიდრეობის დაცვის კავშირის დამფუძნებელი კრება. ახლად დაარსებულ კავშირს თბილისში ექნება სათაო ოფისი. გერმანული კულტურის კავშირის მიზანია, აქტიური დახმარებითა და რეკომენდაციებით ხელი შეუწყოს ქართული მხარის ძალისხმევას სამხრეთ კავკასიაში გერმანული კულტურული მემკვიდრეობის დაცვის საკითხში. ამ მიზნის მიღწევა უნდა განხორციელდეს სხვადასხვა ფორმატით. მაგალითად: სამეცნიერო ღონისძიებების და კვლევითი პროექტების განხორციელებით; ისტორიული ნაგებობების, საგნებისა და ხელნაწერების რესტავრაციით; სამხრეთ კავკასიაში გერმანულენოვანი მედიისა და ამ რეგიონთან დაკავშირებული პუბლიკაციების ხელშეწყობით და სხვა.