ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ თელავში, საგარეჯოში, ბაზალეთსა და წეროვანში მცხოვრებ შეჭირვებულ დევნილ ოჯახებს საოჯახო ინვენტარი და სამუშაო იარაღები ჩაუტანა. თეთრეული, ჭურჭელი, საწოლები, გაზის გამათბობელი, საძილე ტომრები, ხალიჩები და სხვა ინვენტარი იმ საწყობებში ინახებოდა, რომელიც სამინისტრომ აღმოაჩინა და დევნილებს წლების წინ უნდა დარიგებოდათ. ინვენტარი იმ ოჯახებმა მიიღეს, რომლებმაც აღნიშნული თხოვნით სამინისტროს მიმართეს.
კახეთსა და მცხეთა-მთიანეთში საოჯახო ნივთები და ინვენტარი დევნილთა სამინისტროს ტერიტორიული ოგანოს წარმომადგენელმა მერაბ გოქსაძემ ჩაიტანა. მისი თქმით, ამ ეტაპზე, დევნილებმა 17 დასახელების ის ინვენტარი მიიღეს, რაც თავად მოითხოვეს.
როგორც დევნილებმა აღნიშნეს, აღნიშნული ნივთების შეძენას თავად ვერ ახერხებდნენ. მათივე თქმით, მათთვის ნებისმიერი სახის საჩუქარი მნიშვნელოვანია. „ჩვენნაირი გაჭირვებული ხალხისთვის ნებისმიერი სახის დახმარება საჭირო და მნიშვნელოვანია. დევნილთა სამინისტრომ სწორედ ის ინვენტარი ჩამიგვიტანა, რაც გვჭიდებოდა და ვერ ვყიდულობდით. ძალიან გაგვახარეს", - აღნიშნა ბაია მაისურაძემ.
მასალის გამოყენების პირობები