დღეს საქართველოს ეროვნულ მუზეუმში გერმანიის, შვეიცარიისა და ავსტრიის მხარეთა ინიციატივით პროგრამა "სამი ქვეყანა-ერთი ენა" გაიხსნა, რომელიც გულისხმობს მაისი თვის გერმანული ენის თვედ გამოცხადებას.
სამი საელჩოს ერთობლივი ღონისძიებების მიზანია გერმანული ენისა და კულტურის მიმართ საქართველოში უკვე არსებული ინტერესების გაცოცხლება და კიდევ უფრო გაღვივება.
ინიციატივა საქართველოს საგარეო საქმეთა მინისტრის, მაია ფანჯიკიძის პატრონაჟით ხორციელდება.
"გერმანული ენა განსაკუთრებულია ჩემთვის. წლების განმავლობაში ვსწავლობდი და ვმუშაობდი გერმანიაში და ბევრი რამ, რაც ცხოვრების მანძილზე შევძელი, არის გერმანული ენის დამსახურება. ალბათ, სწორედ ამის გამო, ელჩებმა მთხოვეს, რომ ეს აქცია ჩემი პატრონაჟის ქვეშ გამართულიყო, რასაც სიამოვნებით დავთანხმდი.
ვფიქრობ, ძალიან კარგი ინიციატივაა და იმედი მაქვს, რომ ის ღონისძიებები, რომლებიც პროგრამით არის გათვალისწინებული, ბევრ ქართველ ახალგაზრდას გადააწყვეტინებს გერმანული ენის შესწავლას.
გერმანული ენა არის არა მხოლოდ პოლიტიკის, არამედ ეკონომიკის, კულტურის, ფილოსოფიის, მედიცინის ენა, ამიტომ, ნებისმიერი პროფესიის ადამიანს გამოადგება მისი ცოდნა", - განაცხადა ღონისძიებაზე მაია ფანჯიკიძემ.
ეროვნული მუზეუმის დირექტორის, დავით ლორთქიფანიძის თქმით, ეროვნულ მუზეუმს ძალიან მჭიდრო ურთიერთობა აქვს გერმანულენოვან სამივე ქვეყანასთან, განსაკუთრებით გერმანიასთან.
"პირველი რექტორი მუზეუმის იყო გერმანელი მე-19 საუკუნეში და დღესაც ჩვენი მთავარი პარტნიორი არის გერმანიის მუზეუმების კუნძული. ასე რომ, ჩვენი ურთიერთობა გრძელდება. ეს ურთიერთობა არის როგორც არქეოლოგიაში, ისე მეცნიერების სხვა სფეროებში. რაც ყველაზე მნიშვნელოვანია, ჩვენ გვაქვს ბევრი ერთობლივი პროექტი, რომელიც მიმართულია მომავალზე", - აღნიშნა ლორთქიფანიძემ.