4 ტონა დაბინძურებული, ადამიანის ჯანმრთელობისთვის მავნებელი ქათმის ფარში გაანადგურეს სოფლის მეურნეობის სამინისტროს სურსათის ეროვნული სააგენტოს სპეციალისტებმა თბილისის მყარი ნარჩენების პოლიგონზე. ლაბორატორიული კვლევით დადგინდა, რომ თურქეთიდან იმპორტირებულ გაყინული ქათმის ფარში მეზოფილური და ფაკულტატური მიკროორგანიზმებით იყო დასნებოვნებული.
ასევე დიდი რაოდენობით ვადაგასული ძეხვეული, კონსერვი, რძის და საკონდიტრო ნაწარმი ამოიღეს სააგენტოს სპეციალისტებმა თბილისში, წერეთლის გამზირზე, "დინამო" სტადიონის მიმდებარე რამდენიმე სუპერმარკეტის ქსელიდან. იმპორტირებული და ადგილობრივი პროდუქცია ჯერ დაილუქა და აიკრძალა მისი შემდგომი რეალიზაცია, ხოლო შემდეგ განადგურდა შესაბამისი წესების დაცვით.
სურსათის ეროვნული სააგენტო აგრძელებს სამომხმარებლო ბაზრის მონიტორინგს მთელი ქვეყნის მასშტაბით. მიმდინარე წელს სახელმწიფო კონტროლი ჩატარდა 502 საწარმოში; მონიტორინგის განხორციელებისას სხვადასხვა დარღვევაზე დაჯარიმდა 99, ხოლო საწარმოო პროცესი შეუჩერდა 3 ბიზნესოპერატორს. განადგურდა 20 032 123 კგ მყარი და თხევადი სურსათი. მათ შორის, 83 049 კგ ხორცპროდუქტი. ამოღებულია 200 000 ც (535 ყუთი) ვადაგასული კვერცხი; 2 491 ტ დაავადებული კარტოფილი გაბრუნდა იმპორტიორ ქვეყანაში, ხოლო 25 ტ კარტოფილის კიბოთი დაავადებული კარტოფილი განადგურდა.
სააგენტოს ინფორმაციით, 2013 წლის მონაცემებით დღემდე ინსპექტირება ჩაუტარდა 502 ბიზნესოპერატორს, 2012 წელს შემოწმდა სულ 504 ბიზნესოპერატორი;
2013 წლის მონაცემებით დაჯარიმდა 99 ბიზნესოპერატორი (45-ით მეტი 2012წ შედარებით), 2012 წელს დაჯარიმდა 54 ბიზნესოპერატორი;
2013 წლის მონაცემებით საწარმოო პროცესი შეუჩერდა 3 ბიზნესოპერატორს, 2012 წელს საწარმოო პროცესი შეუჩერდა 9 ბიზნესოპერატორს.