30 აპრილს14 საათზე ქართველ პატრიოტთა არასამთავრობო ორგანიზაცია "ეროვნული ფრონტი" ატარებს აქციას "ერთიანი ნაციონალური მოძრაობის" მთავარი ოფისის წინ, რათა დაგმოს 19 აპრილს საქართველოს პარლამენტის შენობის წინ "ნაციონალური მოძრაობის" ლიდერების მიერ გაკეთებული განცხადებები საქართველოში ახალი ეროვნული მოძრაობის დაწყების შესახებ და მიმართავს ხელისუფლებას "ერთიანი ნაციონალური მოძრაობის" დამნაშავე ლიდერებს დააკისროს კანონით გათვალისწინებული პასუხისმგებლობა.
როგორც ორგანიზაცის წარმომადგენელი ევგენი მიქელაძე აცხადებს, "ეროვნული ფრონტი" თვლის, რომ 9 წლის მანძილზე გლობალისტებისა და ტრანსნაციონალური საფინანსო ინსტიტუტების მიერ ხელდასხმული "ერთიანი ნაციონალური მოძრაობის" ანტიქართულმა და ანტიეროვნულმა პოლიტიკურმა, სოციალურ-ეკონომიკურმა თუ კულტურულ-რელიგიურმა საქმიანობამ ქართველი ერი ნაციონალური თვითმყოფადობის და თავისთავადობის დაკარგვის, საკუთარ სამშობლოში სტუმრად და ხიზნად გადაქცევის საფრთხის წინაშე დააყენა.
”ქვეყანაში დარღვეულია ქართული ენის, როგორც სახელმწიფო ენის, კონსტიტუციური უფლებები, უმოწყალოდ სხვისდება ჩვენი წინაპრების მიერ საუკუნეთა მანძილზე სისხლით დაცული მიწა-წყალი და ბუნებრივი რესურსები, მკვიდრდება ანტიქართული და ანტიქრისტიანული ფასეულობები, წესად იქცა სოდომ-გომორული ცოდვის და გაუკუღმართების წახალისება და მხარდაჭერა, განადგურდა და დაიცალა ქართული სოფელი, იცვლება ქვეყნის ეთნიკური შემადგენლობა მთლიან მოსახლეობაში ქართული ეთნოსის ხვედრითი წილის შემცირების ხარჯზე, აღდგა ე.წ. სამხრეთ ოსეთის სტატუსი და შეიქმნა ე.წ. სამხრეთ ოსეთის ადმინისტრაცია, 2008 წლის 8-12 აგვისტოს კატასტროფის შედეგად გაფორმდა მედვედევ-სარკოზის კაპიტულანტური ხელშეკრულება, რაც სერიოზულ საფრთხეს უქმნის საქართველოს ტერიტორიული მთლიანობის აღდგენის პერსპექტივებს, ქვეყანაში კატასტროფულ მასშტაბებს მიაღწია ნარკოდანაშაულმა და ნარკომომხმარებელთა რაოდენობამ, ეკონომიკის და რესურსების მნიშვნელოვანი ნაწილს დაეპატრონნენ ყოფილი მმართველი რეჟიმის წარმომადგენლები, რასაც მოჰყვა კარტელური გარიგებები და ამა თუ იმ ბაზრის მონოპოლიზაცია. ქვეყანას დაუგროვდა 14 მილიარდ დოლარამდე საგარეო ვალი”, -აცხადებს მიქელაძე.
მისივე თქმით, 26 მაისის აქციის მონაწილეთა ბარბაროსული დარბევა კი პირდაპირ შეიძლება შეფასდეს, როგორც ქართველი ერის პროტესტის და თავისუფლების ჩახშობის მიზნით განხორციელებული უსასტიკესი და უსაზარლესი ეკზეკუცია.
”ყოველივე ზემოთქმულის საფუძველზე, "ეროვნული ფრონტი" თვლის, რომ "ერთიანი ნაციონალური მოძრაობის" ლიდერებს და იდეოლოგებს არავითარი მორალური უფლება არ აქვთ ისაუბრონ ახალი ეროვნული მოძრაობის დაწყების შესახებ, ხოლო სახელმწიფოსა და ერის წინაშე ჩადენილ კონკრეტულ დანაშაულში მხილებულთ უნდა დაეკისროს კანონით გათვალისწინებული პასუხისმგებლობა”, - აცხადებს "ეროვნული ფრონტის" წარმომადგენელი.