,,ბზა არის სიმბოლო ძლიერებისა, განახლებისა და ის უნდა შევინახოთ მთელი წლის განმავლობაში", - ბრძანა სრულიად საქართველოს კათოლიკოს პატრიარქმა ილია მეორემ სამების საკათედრო ტაძარში ქადაგებისას და მართლმადიდებელ მრევლს ბზობის დღესასწაული მიულოცა.
"სახარებაში წერია, როდესაც ერი ადიდებდა უფალსა ჩვენსა იესო ქრისტეს, მაცხოვარი ტიროდა. ტიროდა იმიტომ, რომ ხალხი, რომელიც დღეს ადიდებდა და უგალობდა უფალს, რამდენიმე დღის შემდეგ იყვირებს "ჯვარს აცვით იგი". ასეთი ცვალებადია ადამიანი", - ბრძანა უწმინდესმა და აღნიშნა, რომ დღეს არის დღე როცა იესო ქრისტე ზეიმით შედის იერუსალიმში, ზის ვირსა ზედა, მთელი ხალხი ხვდება და ადიდებს სიტყვებით - "ოსანა ძესა დავითისა" და "კურთხეულ არს მომავალი სახელითა უფლისათა".
" ჩვენი ცხოვრებით უნდა შევქმნათ ჯვარი - ვერტიკალი - სწრაფვა ღვთისაკენ და ჰორიზონტალი - სწრაფვა ხალხისაკენ. ბედნიერია ადამიანი, ვინც ამ ჯვარს ქმნის. ჯვარი გეწეროთ. ყოვლადწმინდა სამებამ დაგლოცოთ თქვენ და სრულიად საქართველო", - ბრძანა უწმინდესმა.