სოზარ სუბარის უწყება ქუთაისის #2 სასჯელაღსრულების დაწესებულებაში პატიმრის გარდაცვალების ფაქტს ადასტურებს. როგორც სასჯელაღსრულების სამინისტროს მიერ გავრცელებულ განცხადებაშია აღნიშნული სასჯელაღსრულების დეპარტამენტის # 2 პატიმრობისა და დახურული ტიპის თავისუფლების აღკვეთის დაწესებულებაში გარდაიცვალა 1976 წელს დაბადებული მსჯავრდებული ხ.დ რომელიც სასჯელს იხდიდა სსკ-ის 260-ე მუხლის მეორე ნაწილით.
სამინისტროს ინფორმაციით, მსჯავრდებული ჩართული იყო "მეტადონით ჩანაცვლებითი თერაპიის მკურნალობის" პროგრამაში.
"2013 წლის 14 აპრილს 22:00 საათზე მსჯავრდებულმა თავი შეუძლოდ იგრძნო, რის შემდეგაც სასწრაფოდ იქნა გადაყვანილი ქუთაისის საავადმყოფოში, სადაც რამდენიმე წუთში გარდაიცვალა", - ნათქვმია სასჯელაღსრულების სამინისტროს განცხადებაში.
სამინისტროს ინფორმაციით, გარდაცვლილს ჩაუტარდა სასამართლო-სამედიცინო ექსპერტიზა და გამოძიება ელოდება ჰისტოლოგიური გამოკვლევის შედეგებს, რის შემდეგაც დადგინდება გარდაცვალების ზუსტი მიზეზი.
მომხდარ ფაქტს იძიებს სასჯელაღსრულების, პრობაციისა და იურიდიული დახმარების საკითხთა სამინისტროს საგამოძიებო დეპარტამენტი.
შეგახსენებთ, რომ გავრცელებული ინფორმაციით, პატიმარი ქუთაისის ციხეში ნარკოტიკის ზედმეტი დოზის მიღების შედეგად გარდაიცვალა.
