საქართველოში საინვესტიციო გარემოს გაუმჯობესების მიზნით ახალი ხელისუფლების მიერ გადადგმული ნაბიჯები იყო საქართველოს ფინანსთა მინისტრის, ნოდარ ხადურისა და საინვესტიციო კომპანია J.P.Morgan-ის წარმომადგენლების შეხვედრის მთავარი თემა. ისაუბრეს ჩვენი ქვეყნის მაკროეკონომიკური მდგომარეობის და იმ დიდი ინტერესის შესახებ, რომელსაც უცხოელი ინვესტორები იჩენენ საქართველოს ადგილობრივი ფასიანი ქაღალდების მიმართ. ასევე, ლარით დენომინირებული ფასიანი ქაღალდების ბაზრის განვითარებაში მიღწეულ შედეგებსა და ქვეყნის სამომავლო გეგმებზე.
"J.P.Morgan-თან ფასიანი ქაღალდების ბაზრის პერსპექტივებზე ვისაუბრეთ, საკმაოდ საინტერესეო, მე ვფიქრობ პერსპექტიული მუშაობა შეიძლება შედგეს ამ მიმართულებით საქართველოში" - განაცხადა საქართველოს ფინანსთა მინისტრმა, ნოდარ ხადურმა.
ასევე, შეხვედრა გაიმართა სარეიტინგო კომპანიის „Moody's"-ის ვიცე-პრეზიდენთან, დიეთმარ ჰორნუნგთან. ფინანსთა მინისტრმა სარეიტინგო კომპანიის ხელმძღვანელს საქართველოში ეკონომიკური განვითარების კუთხით შექმნილი ახალი რეალობა გააცნო და იმედი გამოთქვა, რომ „Moody's"-ის სარეიტინგო დასკვნებში აუცილებლად გაითვალისწინებს ჩვენი ქვეყანაში მიმდინარე დადებით პროცესებს.
