დავით-გარეჯის სამონასტრო კომპლექსში შემავალი უდაბნოს მონასტრის ტერიტორიაზე აზერბაიჯანელი მესაზღვრეების დაბრუნების შესახებ გავრცელებულ ინფორმაციას დავით-გარეჯის მღვდელ-მონაზონი კირიონ ონიანი უარყოფს. როგორც "ჯი-ეიჩ-ენს" მღვდელ-მონაზონმა კირიონმა განუცხადა, მედიაში ამის შესახებ არასწორი ინფორმაცია გავრცელდა, რადგან ვითარება ისევ ისეა, როგორც იყო.
მისი თქმით, მონასტრის ტერიტორიაზე ამ ეტაპზე არავითარი ცვლილება არ შეინიშნება და ტურისტები და მომლოცველები ჩვეულებრივად გადაადგილდებიან.
"არც არაფერი სიახლე არ არის, რომ პროცესი დაიძრა და ა.შ, მაგრამ მნიშვნელოვანია, რომ მთავრობასთან გვაქვს კონსტრუქციული ურთიერთობა. შევხვდით შს მინისტრ ირაკლი ღარიბაშვილს, თავდაცვის მინისტრს, გვქონდა საუბარი პატრიარქთან. შეხვედრები გვქონდა ასევე, საგარეო საქმეთა სამინისტროში", - განაცხადა მამა კირიონმა.
მისივე თქმით, რაც 9 წლის განმავლობაში ამ მიმართულებით არ მომხდარა, მოხდა ბოლო 4 თვის განმავლობაში. კერძოდ, მოლაპარაკებები მთავრობასთან და მათთან ინტენსიური კავშირი.
"რა თქმა უნდა ყველაფერი უნდა აისახოს შედეგში. მთავარია მთავრობა აქტიურია და არ გვეუბნება წინა მთავრობასავით, რომ ეს ტერიტორიები აზერბაიჯანისაა. გვეუბნება - ეს ტერიტორიები საქართველოშია და ჩვენია, ამაში ორი აზრი არ უნდა იყოს", - აღნიშნა მღვდელ-მონაზონმა.
უდაბნოს მონასტრის ტერიტორიაზე აზერბაიჯანელი მესაზღვრეების დაბრუნებასთან დაკავშირებით ინფორმაცია რამდენიმე დღის წინ გავრცელდა. გასული წლის 6 მაისს აზერბაიჯანელმა მესაზღვრეებმა საქართველოს მხარეს გადმოიწიეს და უდაბნოს მონასტრის კელიების მიმდებარე ბილიკებზე განთავსდნენ. მესაზღვრეები 5 დღის განმავლობაში ტერიტორიაზე ბერებს, ტურისტებს და მომლოცველებს არ უშვებდნენ. მოლაპარაკებების შემდეგ დავით-გარეჯში სტატუს-ქვო აღდგა.