"საერთაშორისო გამჭვირვალობა - საქართველოს" წარმომადგენლებს მიაჩნიათ, რომ პარლამენტმა საზოგადოებრივი მაუწყებლის სამეურვეო საბჭოს დათხოვნის პრეცედენტი არ უნდა დაუშვას.
როგორც ორგანიზაციის განცხადებაშია ნათქვამია, საზოგადოებრივი მაუწყებელი არასოდეს ყოფილა მოწოდების სიმაღლეზე, რაც მაუწყებლის მენეჯმენტის არაეფექტიანი მართვით და მუდმივი პოლიტიკური წნეხით იყო განპირობებული.
განცხადების თანახმად, სამეურვეო საბჭომ მაუწყებელზე ვერც ეფექტიანი ფინანსური ზედამხედველობის განხორციელება შეძლო და ვერც საზოგადოების ინტერესებზე ორიენტირებული გადაცემები შექმნა.
"სამწუხაროა, რომ საბჭომ ვერც გარე ზეგავლენისგან თანამშრომელთა დაცვა შეძლო. ზემოთქმულიდან გამომდინარე, არსებული საბჭოს დაშლის სურვილი სრულებით გასაგებია, თუმცა, ჩვენი აზრით, საზოგადოებრივ მაუწყებელში არსებული პრობლემების აღნიშვნისას, აუცილებელია მათ გამომწვევ მიზეზებზეც ვისაუბროთ. ვფიქრობთ, რომ ყველა ამ პრობლემის მიზეზი სამეურვეო საბჭოს გარკვეულ წევრებზე პოლიტიკური გავლენის არსებობა იყო", - ნათქვამია განცხადებაში.
"საერთაშორისო გამჭვირვალობის" წარმომადგენელთა თქმით, საზოგადოებამ და ხელისუფლებამ პირველ რიგში, საზოგადოებრივი მაუწყებლის პოლიტიკური გავლენისგან გათავისუფლებაზე უნდა იზრუნონ.
მათივე განცხადებით, საპარლამენტო არჩევნების შემდეგ სამეურვეო საბჭოს სრულად დათხოვნა შექმნის მეტად საშიშ პრეცედენტს, რაც საპარლამენტო უმრავლესობებს მაუწყებლის სამეურვეო საბჭოს სურვილისამებრ შეცვლის შესაძლებლობას მომავალშიც მისცემს.
"ასეთი პრეცენდენტის შექმნის შემთხვევაში, მატულობს პოლიტიკური ჩარევის რისკი არა მხოლოდ საზოგადოებრივი მაუწყებლის, არამედ ყველა იმ სამთავრობო სტრუქტურის საქმიანობაში, რომლებიც პოლიტიკურ ნეიტრალიტეტს უნდა ინარჩუნებდნენ. ვფიქრობთ, რომ პარლამენტმა სამეურვეო საბჭოს დაკომპლექტების წესის განხილვისას უნდა გაითვალისწინოს გარდამავალ პერიოდში სამეურვეო საბჭოს ეტაპობრივად ჩანაცვლების შესაძლებლობა", - აცხადებენ ორგანიზაციის წევრები.
განცხადებაში ასევე აღნიშნულია, რომ როტაციის პრინციპის გათვალისწინებით, უახლოეს პერიოდში საბჭოში 6 ვაკანტური თანამდებობა იქნება, რომელთა შესავსებად უკვე დაკომპლექტების ახალი წესები შეიძლება იქნას გამოყენებული.
კერძოდ, ასეთი მიდგომის შემთხვევაში, ხელისუფლება თავიდან აიცილებს საბჭოს დაშლის ნეგატიურ პრეცედენტს, უზრუნველყოფს სამეურვეო საბჭოს დამოუკიდებლობის მეტ ხარისხს და შეასრულებს საერთაშორისო ორგანიზაციების, მათ შორის, ეუთოს რეკომენდაციებს აღნიშნულ საკითხთან დაკავშირებით.
