რაბათის კომპლექსის დირექტორის გუჯა ბიჭაშვილის განცხადებით, ციხის რეკონსტრუქცია შესაძლებელია მოხდეს, თუმცა თავად ძეგლს არაფერი ემუქრება.
როგორც მან განმარტა, ამ ეტაპზე რაბათის კომპლექსი ჩვეულ რეჟიმში ფუნქციონირებს და დამთვალიერებელს ყოველდღიურად ელოდება.
"გამორიცხულია, რაც გუშინ გაკეთდა განცხადება, რომ თურმე რაბათი ინგრევა. ეს არის სისულელე გამონათქვამი. რაბათის ციხე უფრო ლამაზდება. უფრო უკეთესობისკენ მიდის. ჩამოდით და ნახეთ, რომ უამრავი ბრენდი იხსნება. ჩამოდიან ინგლისიდან, რუსეთიდან სხვადასხვა მოღვაწეები", - განაცხადა ბიჭაშვილმა.
მისი თქმით, რაბათის ციხეს ასევე, სტუმრობენ საკონცერტო ჯგუფებიც, ასე რომ ციხის ნგრევაზე საუბარი გამორიცხულია.
საქართველოს პრეზიდენტის პრესსპიკერმა მანანა მანჯგალაძემ მასმედიის წარმომადგენლებს გუშინ ის დოკუმენტი გააცნო, რომელიც პრეზიდენტის ადმინისტრაციაში საქართველოს მთავრობიდან შევიდა.
დოკუმენტი მომზადებულია საგარეო საქმეთა და კულტურის სამინისტროების მიერ, არის გრიფით „ფრიად სასწრაფო" და შეეხება ქართული და თურქული ძეგლების დაცვას ორი ქვეყნის ტერიტორიაზე.
მანანა მანჯგალაძემ აღნიშნული დოკუმენტის რამდენიმე პარაგრაფი წაიკითხა, რომლებიც რაბათის ციხის ცვლილებებს ითვალისწინებს.
ამასთან, კულტურის მინისტრის პირველი მოადგილე მარინე მიზანდარი აცხადებს, რომ ხელისუფლება რაბათის ციხის დაშლას არ აპირებს. საუბარია მხოლოდ იმ შეცდომების გამოსწორებაზე, რაც კომპლექსის განახლების პროცესშია დაშვებული.