პარლამენტის თავდაცვისა და უშიშროების კომიტეტის თავმჯდომარის, ირაკლი სესიაშვილის მოწვევით, ქუთაისის კადეტთა სამხედრო ლიცეუმის კადეტები დღეს პარლამენტს ეწვივნენ.
კადეტებმა პარლამენტის შენობა დაათვალიერეს, საპარლამენტო საქმიანობას გაეცნენ, პლენარულ სხდომას დაესწრნენ და პარლამენტის თავდაცვისა და უშიშროების კომიტეტის თავმჯდომარეს, ირაკლი სესიაშვილს შეხვდნენ.
ირაკლი სესიაშვილი კადეტებს თავდაცვისა და უშიშროების კომიტეტის საქმიანობაზე და თავდაცვის სფეროსთან დაკავშირებულ იმ საკანონმდებლო ინიციატივებზე ესაუბრა, რომელთა განხილვაც ამჟამად პარლამენტში მიმდინარეობს.
,,მიმაჩნია, რომ პარლამენტს და დეპუტატებს მჭიდრო კავშირი უნდა ჰქონდეთ შეიარაღებულ ძალებთან, სამხედრო მოსამსახურეებთან. მე ვიყავი კადეტთა სამხედრო ლიცეუმში. მათ შექმნილი აქვთ არაჩვეულებრივი პირობები იმისთვის, რომ მიიღონ სამხედრო განათლება და დაეუფლონ იმ პროგრამებს, რაც საგანმანათლებლო სისტემაშია დანერგილი. სურვილი გაგვიჩნდა დავამკვიდროთ ერთგვარი ტრადიცია, რომ კადეტები ესტუმრონ პარლამენტს, გაეცნონ საპარლამენტო საქმიანობას, დავგეგმოთ ერთობლივი კულტურული და სპორტული ღონისძიებები. ვფიქრობ, ეს იქნება ძალიან კარგი როგორც პარლამენტისთვის, ისე მომავალი ოფიცრებისთვის", - განაცხადა თავდაცვისა და უშიშროების კომიტეტის თავმჯდომარემ, ირაკლი სესიაშვილმა.
პარლამეტში სტუმრობისას კადეტებს ფრაქცია ,,ქართული ოცნების" თავმჯდომარე ზაქარია ქუცნაშვილი შეხვდა.
