ოსმა სეპარატისტებმა 18 წლის უშანგი დოთიაშვილი გაათავისუფლეს. ინფორმაცია ამის შესახებ სააგენტო "ჯი-ეიჩ-ენ"-თან საუბრისას საქართველოს შს სამინისტროს ანალიტიკური დეპარტამენტის დირექტორმა დავით სუჯაშვილმა დაადასტურა.
"უშანგი დოთიაშვილი გათავისუფლებულია. ასევე გათავისუფლებულნი არიან დაკავებულები შუბითიძე და ჯეირანაშვილი", _ განაცხადა დავით სუჯაშვილმა სააგენტოსთან საუბრისას.
შეგახსნებთ, რომ ე.წ. საზღვრისპირა სოფლის მკვიდრი ახალგაზრდა, სამი დღის წინ რუსმა ოკუპანტებმა საკუთარი საცხოვრებელი სახლიდან ასიოდე მეტრის დაშორებით დააკავეს.
უშანგი დოთიაშვილის თქმით, ოკუპანტებმა იგი ჯერ გრომის ე.წ. მილიციის განყოფილებაში, შემდეგ კი ცხინვალში გადაიყვანეს. 18 წლის ახალგაზრდა აცხადებს, რომ მასზე ცხინვალის საპატიმროში არანაირი ზეწოლა არ განხორციელებულა.
ოსურ მხარესთან მოლაპარაკებებს შიდა ქართლის სამხარეო პოლიცია და შს სამინისტროს ანალიტიკური დეპარტამენტი აწარმოებდა. აღნიშნული მოლაპარაკებების საფუძველზე, ოსმა სეპარატისტებმა ქართულ მხარეს კიდევ ორი დაკავებული - შუბითიძე და ჯეირანაშვილი გადასცეს.
