2012 წლის 1 იანვრიდან 2013 წლის 18 თებერვლამდე სოციალური მომსახურების სააგენტოში სულ პრემიებზე 5 მლნ158 ათას 25 ლარი დაიხარჯა. აღნიშნულ ინფორმაციას, საჯარო ინფორმაციის მონაცემთა ბაზა ავრცელებს. მათივე ინფორმაციით, გაცემული პრემიებიდან, 4 მლნ 930 ათას 960 ლარი განაწილდა თანამშრომლებზე, ხოლო 227 ათას 65 ლარი გაიცა სააგენტოს ხელმძღვანელობაზე. კერძოდ, სააგენტოს დირექტორმა რამაზ სულამანიძემ 2012 წლის 1 იანვრიდან 2013 წლის 18 თებერვლამდე დროის პერიოდში პრემიის სახით მიიღო 33 665 ლარი. საინტერესოა, რომ მის ოთხივე მოადგილეს სააგენტოს ხელმძღვანელზე დიდი ოდენობის პრემიები დაერიცხათ: მამუკა გელოვანი - 46 620 ლარი; მამუკა მაჭავარიანი - 49 610 ლარი; დავით დვალიძე - 51 685 ლარი, კახა ხელაძე - 45 485 ლარი.
2013 წლის 1 იანვრიდან დირექტორის თანამდებობრივი სარგო შეადგენს 2 600 ლარს, რაც წლიურად 31 200 ლარს უტოლდება. შესაბამისად, სააგენტოს დირექტორმა 2012 წლის 1 იანვრიდან 2013 წლის 18 თებერვლის ჩათვლით ხელფასის ერთმაგი ოდენობის პრემია აიღო. დირექტორის მოადგილეების შემთხვევაში თანამდებობრივი სარგო შეადგენს 2 400 ლარს, რაც წელიწადში 28 800 ლარს აღწევს. როგორც ზემოთ მოცემული ინფორმაციით შეგვიძლია ვიმსჯელოთ, მოადგილეები ხელფასზე გაცილებით მეტ პრემიებს იღებდნენ. კერძოდ, მამუკა გელოვანი და კახა ხელაძე - ხელფასზე 1.4-ჯერ მეტს, მამუკა მაჭავარიანი - 1.5-ჯერ მეტს, ხოლო დავით დვალიძე - 1.85-ჯერ მეტ თანხას.
სსიპ სოციალური მომსახურების სააგენტოში სულ დასაქმებულია 1 773 ადამიანი, და სააგენტოს წლიური სახელფასო ფონდი შეადგენს 16 243 000 ლარს.
