კულტურისა და ძეგლთა დაცვის ყოფილი მინისტრი ნიკოლოზ რურუა აჭარის ტერიტორიაზე უფრო დიდი და პომპეზური მეჩეთის აშენების საკითხში საგანგაშოს ვერაფერს ხედავს. როგორც მან დღეს "პირველი რადიოს" რადიოკლუბში აღნიშნა, აჭარაში მეჩეთის აღდგენა შეთანხმებული იყო, თუმცა ეს ყველაფერი ადგილობრივების წინააღმდეგობამ და აჭარის ეპარქიამ შეაჩერა.
„არ ავღნიშნავდი ამ ფაქტს, რომ არ ყოფილიყო ეს მოწოდებული როგორც ახალი შეთანხმება, ახალი მიღწევა. ეს ყველაფერი შეთანხმებული იყო. მხოლოდ ადგილობრივმა წინააღმდეგობამ, აჭარის ეპარქიამ შეაჩერა ეს მოლაპარაკება მაშინ. წინადადება იყო ასეთი, რომ ჩვენს ქართულ ძეგლებს ქართველი სპეციალისტები აღადგენდნენ თურქეთის ტერიტორიაზე და სანაცვლოდ ის განადგურებული მეჩეთი აზიზიე, რომელსაც თურქებისთვის ჰქონდათ სომბოლური მნიშვნელობა, უნდა აღვედგინა ნებისმიერ ადგილას ბათუმის ტერიტორიაზე", - განაცხადა რურუამ.
მისი თქმით, ამის სანამცვლოდ, ახალ ხელშეკრულებაში ნათქვამია, რომ აზიზია არ აღდგება, თუმცა მის ნაცვლად აშენდება ახალი მეჩეთი.
რურუას განცხადებით, დარწმუნებულია, რომ ახალი მეჩეთი უფრო დიდი და პომპეზური იქნება.
"მე პირადად ამაშიც არ ვხედავ ვერაფერს საგანგაშოს. ბათუმში, ისევე როგორც მთლიან აჭარაში არის 200-მდე მეჩეთი, მაგრამ ამას არავითარი პრობლემა არ შეუქმნია", - განაცხადა ნიკოლოზ რურუამ.
აჭარის ა/რ სამთავრობო დელეგაცია არჩილ ხაბაძის მეთაურობით მიმდინარე თვეში თურქეთის რესპუბლიკაში ოფიციალურ ვიზიტით იმყოფებოდა.
მთავრობის თავმჯდომარე საქართველო-თურქეთის პარლამენტთაშორისი მეგობრობის ჯგუფის თავმჯდომარეს შეხვდა. საუბარი შეეხო აჭარაში მეჩეთის მშენებლობას. პარლამენტთაშორისი მეგობრობის ჯგუფის თავმჯდომარემ არჩილ ხაბაძეს მშენებლობისთვის ტერიტორიის გამოყოფა სთხოვა.
მთავრობის თავმჯდომარის განცხადებით, ამ საკითხთან დაკავშირებით მოლაპარაკებები მიმდინარეობს და საბოლოო გადაწყვეტილება ურთიერთშეთანხმების გზით იქნება მიღებული.