1-ლი აპრილიდან 2013-2014 სასწავლო წლისთვის პირველკლასელთა რეგისტრაცია იწყება.
განათლების სამინისტროს ინფორმაციით, ყველა პირველკლასელს პერსონალური კომპიუტერი გადაეცემა.
სკოლაში ბავშვის შეყვანა მშობელს 5 წლის ასაკიდან შეუძლია, თუმცა მშობელი შვილის სკოლაში შეყვანის ასაკთან დაკავშირებით არჩევანს თავად აკეთებს.
რეგისტრაცია ონლაინ რეჟიმში განხორციელდება და სამ ეტაპად ჩატარდება:
I ეტაპი. 01/04/2013-დან 19/04/2013. რეგისტრაცია განხორციელდება სკოლაში, მხოლოდ იმ მოსწავლეებისთვის:
ვისი და-ძმა სწავლობს ამ სკოლაში;
ვისი მშობელიც არის სკოლის თანამშრომელი;
ვისი ოჯახიდან ერთდროულად ორი ან მეტი ბავშვი შედის პირველ კლასში (ტყუპები, და-ძმები).
II ეტაპი. 25/04/2013-დან 03/07/2013 განხორციელდება პირველკლასელთა საყოველთაო ონლაინ რეგისტრაცია.
სპეციალური აპლიკაცია განთავსდება ვებ-გვერდებზე: www.registration.emis.ge; www.mes.gov.ge. მშობელი ირჩევს მხოლოდ ერთ სკოლას და რეგისტრაციის ფორმაში შეაქვს მონაცემები: ბავშვის სახელი, გვარი და პირადი ნომერი. სასურველ სკოლაში პირველკლასელთა ონლაინ რეგისტრაციისთვის საცხოვრებელ ადგილს მნიშვნელობა არ ენიჭება.
მშობელი პასუხს შვილის სასურველ სკოლაში ჩარიცხვის შესახებ რეგისტრაციის წარმატებით დასრულებისთანავე იღებს. მას სისტემის მიერ მინიჭებული უნიკალური კოდი მოკლე ტექსტური შეტყობინების საშუალებითაც ეგზავნება, რომელიც მშობელმა უნდა შეინახოს.
მშობელს სკოლის არჩევაში დაეხმარება ვებ-გვერდი www.catalog.edu.ge, სადაც ყველა საჯარო სკოლის შესახებ დეტალური ინფორმაციაა განთავსებული.
მშობელი ვალდებულია რეგისტრაციიდან 2 კვირის ვადაში სკოლაში მოსწავლის დოკუმენტაცია წარადგინოს. ვადის გასვლის შემდეგ სისტემა ავტომატურად მოახდენს რეგისტრაციის გაუქმებას.
III ეტაპი. 29/06/2013-დან 05/07/2013. მშობელს შესაძლებლობა ექნება გამოთავისუფლებულ ადგილებზე მოახდინოს სურვილისამებრ გადარეგისტრირება და საბუთების წარდგენა სკოლაში.
მშობელს რეგისტრაციის გაუქმება შეუძლია რეგისტრაციის დროს მინიჭებული უნიკალური კოდის და ბავშვის პირადი ნომრის მიხედვით. თუ მშობელმა გადაწყვიტა ერთ სკოლაში მოხსნას და მეორეში დაარეგისტრიროს შვილი, წინასწარ ეკრანზე გამოტანილ ფანჯარაში სასურველ სკოლაში დარჩენილი თავისუფალი ადგილების არსებობა უნდა შეამოწმოს.