ამერიკის შეერთებული შტატების სახელმწიფო დეპარტამენტმა ისლამური დაჯგუფება „ანსარ ად-დინი", რომელიც მალის ტერიტორიაზე მოქმედებს, ტერორისტულ ორგანიზაციად გამოაცხადა. ამის შესახებ ინფორმაციას უწყების საიტი ავრცელებს.
სახელმწიფო დეპარტამენტის მონაცემებით, დაჯგუფება „ალ-ქაიდასა" და სხვა ტერორისტულ ორგანიზაციებთან ალიანსში მოქმედებს, რომლებიც საერთაშორისო ტერორისტულ ორგანიზაციათა სიაში არიან შეყვანილი. „ანსარ ად-დინი" პასუხისმგებელია 2012 წელს ქალაქ აგელჰოკში მომხდარ თავდასხმაზე, რომლის დროსაც 82 მალელი სამხედრო მოკლედ და 30 ტყვედ აიყვანეს. ამასთანავე, დაჯგუფება წლების განმავლობაში ხალხს იტაცებდა და სიკვდილით სჯიდა.
ამის შემდეგ, აშშ-ის მოქალაქეებს აეკრძალათ ამ ორგანიზაციის წარმომადგენლებთან რაიმე სახის საქმიანობის წარმოება, ხოლო დაჯგუფების წევრებს აშშ-ში ჩასვლა. „ანსარ ად-დინი" „რწმენის დამცველებს" ნიშნავს. მისი მებრძოლები ეთნიკური ტუარეგები არიან, რომლებიც ისლამის სალაფიტურ მიმართულებას მისდევენ.
