ქუთაისის სასწრაფო-სამედიცინო დახმარების ყოფილმა და ამჟამინდელმა ექიმებმა საპროტესტო აქცია გამართეს.
აქციის მონაწილე ექიმები შრომითი პირობების გაუმჯობესებას, ხელფასების მომატებას და გათავისუფლებული თანამშრომლების სამსახურში დაბრუნებას მოითხოვდნენ.
მათი განცხადებით, თუ მათი მოთხოვნები არ დაკმაყოფილდება ისინი პერმანენტულ აქციებს გამართავენ.
"ჩვენი ხელფასი ძალიან მინიმალურია, რაც მედპერსონალისთვის მიუღებელია. ჩემი თხოვნა იქნება გაითვალისწინონ და რაც ექიმს ეკადრება ისეთი ხელფასი დაგვინიშნონ", - განაცხადა აქციის ერთ-ერთმა მონაწილე მარინა გიორგაძემ.
როგორც „ჩემი ოჯახის კლინიკის" ქუთაისის სასწრაფო-სამედიცინო დახმარების მენეჯერი მაია რუხაძე აცხადებს, ექიმების მოთხოვნები უსაფუძვლოა.
მისი თქმით, ექიმები ანაზღაურებას კანონით გათვალისწინებული სარგოთი იღებენ.
რაც შეეხება გათავისუფლებულ თანამშრომლებს, რუხაძის განცხადებით, კომპანიისთვის პრიორიტეტი მაღალკვალიფიციური კადრია. შესაბამისად, კონკურსისა და ტესტირების ჩატარების შემდეგ, თანამშრომლეთა გარკვეული ნაწილი სასწრაფო დახმარებიდან დაითხოვეს.