9-10 მარტს საქართველოს პირველი ლედი სანდრა ელისაბედ რულოვსი გურიის რეგიონს ესტუმრება და საქველმოქმედო ფონდ SOCO-ს მობილური სამედიცინო ჯგუფის ექიმებთან ერთად მონაწილეობას მიიღებს მოსახლეობის უფასო სამედიცინო გამოკვლევებში.
ფონდ SOCO-ს მობილურ სამედიცინო ჯგუფს საქველმოქმედო საქმიანობის მრავალწლიანი გამოცდილება აქვს. 2005 წლიდან ფონდი რეგულარულად აგზავნის ექიმებს საქართველოს სხვადასხვა რეგიონში პაციენტების უფასოდ გასასინჯად.
9-10 მარტს გურიის რეგიონში, (ლანჩხუთში და ეწერში) დაგეგმილი საქველმოქმედო აქცია გერმანული საერთაშორისო ორგანიზაციის The Johanniter International-ისა და გაეროს მოსახლეობის ფონდის (UNFPA) მხარდაჭერით განხორციელდება. 9 მარტს მოსახლეობის მიღება მოხდება სოფელ ეწერში საბავშვო ბაღის შენობაში, ხოლო 10 მარტს ლანჩხუთშიA`ავერსის" კლინიკაში.
ჯგუფის შემადგენლობაში შედიან: თერაპევტი, ბავშვთა ნევროლოგი, ნევროლოგი, ენდოკრინოლოგი, კარდიოლოგი, ოფთალმოლოგი, ექოსკოპისტი, გინეკოლოგი, კოლპოსკოპისტი.
აქციის ფარგლებში სოციალურად დაუცველ ოჯახებს ჩაუტარდებათ უფასო სამედიცინო გამოკვლევები და დაურიგდებათ საჭირო მედიკამენტები, ხოლო ახალგაზრდა დედები და ორსული ქალები კი მიიღებენ სპეციალურ საჩუქარს - ე.წ. სასტარტო პაკეტს ბავშვის მოვლის საშუალებებით. მობილური ჯგუფის წევრები მოსახლეობას ასევე დაურიგებენ ბუკლეტს ქალის ჯანმრთელობის შესახებ.
ფონდ SOCO-ს მობილური ჯგუფი გურიის რეგიონს ივნისის ბოლომდე საქმელმოქმედო მისიით ცხრაჯერ ესტუმრება.