„საზოგადოებრივი მაუწყებლის" თანამშრომლებმა საქართველოს პარლამენტს და პარლამენტის თავმჯდომარეს დავით უსუფაშვილს მიმართეს.
მიმართვის ტექსტს "ჯი-ეიჩ-ენი" უცვლელად გთავაზობთ:
საქართველოს პარლამენტს
საქართველოს პარლამენტის თავმჯდომარეს
ბატონ დავით უსუფაშვილს
სსიპ „საზოგადოებრივი მაუწყებლის" მრავალრიცხოვან თანამშრომელთა
გ ა ნ ც ხ ა დ ე ბ ა
მოგახსენებთ, რომ საზოგადოებრივი მაუწყებელის სამეურვეო საბჭომ ა.წ. 04.03.2013 გამართულ სხდომაზე უნდობლობა გამოუცხადა და თანამდებობიდან გადააყენა საზოგადოებრივი მაუწყებლის გენერალური დირექტორი გიორგი ბარათაშვილი (სხდომის ოქმი თან ერთვის განცხადებას). ამ გადაწყვეტილების მიმართ გაჩენილი კითხვებისა და ეჭვების გამო საზოგადოებრივი მაუწყებლის მრავალრიცხოვანი თანამშრომლები შეხვდნენ სამეურვეო საბჭოს და მოსთხოვეს, გადაეხედა მიღებული გადაწყვეტილებისთვის, რადგან არგუმენტები, რომლებიც საბჭოს წევრებმა შეხვედრაზე წარმოადგინეს, მათთვის იყო დაუსაბუთებელი და ბადებდა გონივრულ ეჭვს სამეურვეო საბჭოს წევრების მოტივირების მიმართ.
სამეურვეო საბჭომ მეორე სხდომაზე (07.03.2013) უგულებელყო თანამშრომელთა ნება და ძალაში დატოვა წინა სხდომის გადაწყვეტილება. (იხილეთ ვიდეოჩანაწერი საიტზე: www.gpb.ge).
საზოგადოებრივი მაუწყებლის თანამშრომლებს გაგვიჩნდა დასაბუთებული ეჭვი, რომ ორივე გადაწყვეტილება არა მხოლოდ უსამართლო და არგუმენტებს მოკლებულია, არამედ პირველი სხდომა კანონდარღვევითაცაა ჩატარებული, რაც მოგვიანებით დაადასტურა ახალგაზრდა იურისტთა ასოციაციის თავმჯდომარემ კახა კოჟორიძემ. (გენერალური დირექტორის გადაყენებას სჭირდება სამეურვეო საბჭოს წევრთა 2/3 რაც ნიშნავს 10 ხმას, ხოლო გადაწყვეტილება მიღებულ იქნა 9 ხმით. კანონი "მაუწყებლობის შესახებ 32' მუხლი).
საზოგადოებრივი მაუწყებლის მრავალრიცხოვან თანამშრომელთა ჯგუფი უნდობლობას უცხადებს მოქმედ სამეურვეო საბჭოს იმ წევრებს, რომელთაც მიიღეს უკანონო გადაწყვეტილება და გააღრმავეს მაუწყებელში არსებული სერიოზული კრიზისი.
ჯერ კიდევ 2012 წლის 21 დეკემბერს საზოგადოებრივი მაუწყებლის თანამშრომელთა საინიციატივო ჯგუფმა უნდობლობა გამოუცხადა სამეურვეო საბჭოს და მოსთხოვა პასუხისმგებლობის აღება იმ კრიზისულ ვითარებაზე, რომელიც მაშინ შეიქმნა საზოგადოებრივ მაუწყებელში. ჯგუფმა საქართველოს პარლამენტის თავმჯდომარეს გაუგზავნა მიმართვა და სთხოვა სამეურვეო საბჭოს თავმჯდომარისაგან მოეთხოვა რიგგარეშე ანგარიში.
სამეურვეო საბჭომ არათუ გაითვალისწინა თანამშრომელთა იმდროინდელი მოთხოვნები, არამედ უფრო ღრმა კრიზისში შეიყვანა მაუწყებელი, რაც გამოიხატა მის მიერ არჩეული გენერალური დირექტორის გაუგებარი მიზეზით გათავისუფლებაში.
რამდენადაც, მოქმედი კანონმდებლობით, საქართველოს პარლამენტს შეუძლია განიხილოს სამეურვეო საბჭოს წევრების ინდივიდუალური იმპიჩმენტის საკითხი, გთხოვთ, „საზოგადოებრივი მაუწყებლის" სამეურვეო საბჭოს თავმჯდომარის და იმ წევრების მიმართ, რომლებმაც მიიღეს ზემოაღნიშნული გადაწყვეტილება და გააღრმავეს კრიზისი, დააჩქაროთ საკითხის განხილვა - საზოგადოებრივი მაუწყებლის მრავალრიცხოვანი თანამშრომლების მხრიდან სამეურვეო საბჭოსადმი უნდობლობის გამოცხადების შესახებ.
07.03.20013
განცხადების ტექსტს თან ახლავს ხელმოწერები. ხელმოწერები გრძელდება.