შინაგან საქმეთა სამინისტროში წელს პირველად აღინიშნა ქალთა საერთაშორისო დღე - 8 მარტი. მინისტრმა ირაკლი ღარიბაშვილმა სამინისტროს თანამშრომელ ქალბატონებს პირადად მიულოცა დღესასწაული და განსაკუთრებული დამსახურებისათვის დააჯილდოვა. მინისტრის გადაწყვეტილებით, სამინისტროში 8 მარტის აღნიშვნა ტრადიციად დამკვიდრდება.
ირაკლი ღარიბაშვილმა მილოცვისას ხაზგასმით აღნიშნა ქალების განსაკუთრებული როლი სამინისტროს ყოველდღიურ, წარმატებულ საქმიანობაში და განაცხადა, რომ მომავალი ორი წლის განმავლობაში სამინისტროში მომუშავე ქალბატონების რიცხვი 12-დან 20 პროცენტემდე გაიზრდება. მინისტრმა ასევე ისაუბრა ქალი-სამართალდამცველების მიერ შეტანილი მნიშვნელოვანი წვლილის შესახებ ისეთი დანაშაულების გახსნისას, როგორიცაა ტრეფიკინგთან ბრძოლა, არასრულწლოვნების მიერ ჩადენილი დანაშაულები, ოჯახური კონფლიქტების მოგვარება და სხვა.
ირაკლი ღარიბაშვილმა შინაგან საქმეთა სამინისტროს სხვადასხვა ოპერატიული დანაყოფის 47 თანამშრომელ ქალბატონს პირადად გადასცა მედალი - „ოპერატიულ-სამძებრო საქმიანობაში შეტანილი განსაკუთრებული წვლილისათვის".
ქალბატონებს ასევე გადაეცათ თაიგულები და სხვა საჩუქრები.
