რომის პაპმა, ბენედიქტ მეთექვსმეტემ პოსტი დატოვა. ახლა ის ღირსი პონტიფიკოსის ტიტულს ატარებს. "როიტერის" ინფორმაციით, 28 თებერვლის დილას ბენედიქტ მეთექვსმეტემ, პაპის ამპლუაში, უკანასკნელად მიიღო ას კარდინალზე მეტი ვატიკანში, უკანასკნელად გაიხედა ფანჯრიდან და რეზიდენციასთან შეკრებილი მლოცველები დალოცა. ამის შემდეგ პაპი ვერტმფრენით კასტელ განდოლფოში გაემგზავრა, სადაც ამის შემდეგ იცხოვრებს.
ბენედიქტ მეთექვსმეტე, ერისკაცობაში იოზეფ რატცინგერი, რომის პაპად 2005 წლის აპრილში, იოანე პავლე მეორის გარდაცვალების შემდეგ აირჩიეს. ახალი პაპი ამ დროს 78 წლის იყო და გახდა ყველაზე ხნიერი პაპი უკანასკნელი 275 წლის განმავლობაში. 2013 წლის 11 თებერვალს პაპმა გადადგომის შესახებ განაცხადა, რაც კათოლიკებისათვის სრული მოულოდნელობა აღმოჩნდა. კარდინალები რომში 4 მარტს შეიკრიბებიან და ახალი პაპის არჩევის თარიღს დანიშნავენ. ბენედიქტ მეთექვსმეტე არჩევნებში მონაწილეობას არ მიიღებს.