დღეს, 28 თებერვალს, საქართველოს სახალხო არტისტს რამაზ ჩხიკვაძეს 85 წელი შეუსრულდებოდა.
მსახიობის საიუბლილეო თარიღს საქართველოს კულტურისა და ძეგლთა დაცვის სამინისტრო, რამაზ ჩხიკვაძის სახელობის ფონდი „ბერიკა", საქართველოს თეატრის, მუსიკის, კინოსა და ქორეოგრაფიის სახელმწიფო მუზეუმი, საქართველოს ეროვნული არქივი და შოთა რუსთაველის სახელობის სახელმწიფო დრამატული თეატრი სხვადასხვა ღონისძიებებით აღნიშნავენ.
13:00 სთ-ზე, საქართველოს თეატრის, მუსიკის, კინოსა და ქორეოგრაფიის სახელმწიფო მუზეუმში რამაზ ჩხიკვაძის ბიუსტის გახსნის ცერემონია გაიმართება, ბიუსტის ავტორია მოქანდაკე გურამ პიპინაშვილი.
15:00 სთ-ზე, საქართველოს ეროვნულ არქივში საქართველოს სახალხო არტისტის რამაზ ჩხიკვაძის 85 წლის იუბილესადმი მიძღვნილი გამოფენა გაიხსნება. საქართველოს ეროვნული არქივი ექსპოზიციაზე წარმოადგენს 85 ფოტოს და კინოკადრებს, რომლებიც კინოფოტოფონოდოკუმენტების ცენტრალურ არქივშია დაცული და ასახავს რამაზ ჩხიკვაძის ცხოვრებისა და შემოქმედებით გზას, მის თეატრალურ სახეებსა და კინოროლებს, შეხვედრებსა და რეპეტიციებს.
16:00სთ-ზე, დაგეგმილია მსახიობის საფლავზე გასვლა დიდუბის მწერალთა და საზოგადო მოღვაწეთა პანთეონში
17:00 სთ-ზე, 9 აპრილის ბაღში (ალექსანდრეს ბაღში) დაიდგმება სიმბოლური ქვა, სადაც უახლოეს მომავალში ზურაბ წერეთლის ქანდაკება, რამაზ ჩხიკვაძის „აზდაკი" აღიმართება.
19:00 სთ-ზე, რუსთაველის თეატრის ექსპერიმენტულ დარბაზში გაიმართება საღამო, სადაც ნაჩვენები იქნება ფრაგმენტები ლილი კოპლატაძისა და ია შერაზადიშვილის გადაცემიდან „აუდიტორია - რამაზ ჩხიკვაძე". გადაცემაში რამაზ ჩხიკვაძე თავად საუბრობს საკუთარ ცხოვრებასა და შემოქმედებაზე. 90-იან წლებში ჩაწერილი მონოლოგის შემდეგ რამაზ ჩხიკვაძის პარტნიორები, მათ შორის კახი კავსაძე, ნანა ფაჩუაშვილი, ჯემალ ღაღანიძე, ასევე რობერტ სტურუა გაიხსენებენ მსახიობს.
რამაზ ჩხიკვაძე 1928 წლის 28 თებერვალს თბილისში დაიბადა. 1951 წელს დაამთავრა რუსთაველის სახელობის სახელმწიფო თეატრალური ინსტიტუტის სამსახიობო ფაკულტეტი. იყო მიხეილ თუმანიშვილის მოწაფე. ამავე წლიდან რუსთაველის თეატრის მსახიობია. ჩხიკვაძის შემოქმედებისთვის დამახასიათებელია მკაფიო ინდივიდუალობა, თვითმყოფობა, დიდი შემოქმედებითი ფანტაზია, იმპროვიზაციისა და გარდასახვის ოსტატობა.
რამაზ ჩხიკვაძის მიერ განსახიერებული როლები: ლეანდრო (ჯ. ფლეჩერის "ესპანელი მღვდელი"), ვეფხია გაბიდაური (კ. ბუაჩიძის "ამბავი სიყვარულისა"), ქოსა მრჩეველი (გ. ნახუცრიშვილის "ჭინჭრაქა"), მაქჰითი (ბ. ბრეხტის "სამგროშიანი ოპერა"), თედო (მ. ელიოზიშვილის "ბებერი მეზურნეები" ), ფადინარი (ე. ლაბიშის "ჩალის ქუდი"), აკოფა (ა. ცაგარელის "ხანუმა"), კირილე მიმინოშვილი (დ. კლდიაშვილის "სამანიშვილის დედინაცვალი"), შოშია (ნ. დუმბაძის "საბრალდებო დასკვნა") და სხვა.
ჩხიკვაძის შემოქმედებაში ახალი ეტაპია რეჟისორ რობერტ სტურუას დადგმებში მონაწილეობა (ყვარყვარე, პ. კაკაბაძის "ყვარყვარე", აზდაკი, ბ. ბრეხტის "კავკასიური ცარცის წრე", რიჩარდ მესამე, შექსპირის "რიჩარდ მესამე", მოხუცი რეჟისორი რ. სტურუას, ლ. ფოფხაძისა და ა. ვარსიმაშვილის "ვარიაციები თანამედროვე თემაზე" და სხვა). ამ წარმოდგენებში მხატვრულ ხერხად გამოყენებულია ყოფითისა და პათეტიკის, რეალურისა და პირობითის დაპირისპირება, მოვლენების მოულოდნელი პერიფრაზირება, მეტაფორული აზროვნება, რასაც მსახიობი აღწერს განსჯისა (ფსიქოლოგიური განცდის საპირისპიროდ) და სრულყოფილი აქტიორული ხელოვნების მეშვეობით. ჩხიკვაძე გარდასახვასთან ერთად სცენაზე გვიჩვენებს თავის დამოკიდებულებას გმირისადმი. ჟესტიკულაციით, პოზითა და მეტყველების მანერით იგი ზუსტ ასოციაციურ მინიშნებას აღწევს. ამ როლებმა ჩხიკვაძეს მსოფლიო აღიარება მოუპოვა.
რამაზ ჩხიკვაძე გადაღებულია კინოფილმებში: "ლონდრე" (დიამბეგი, 1963), "ჩირიკი და ჩიკიტელა" (გიტარა-მაიორი, 1975), "ნატვრის ხე" (მღვდელი, 1977), "ნერგები" (ლუკა, 1974, მოსკოვის VIII საერთაშორისო კინოფესტივალზე მიენიჭა პრემია მამაკაცის როლის საუკეთესო შესრულებისთვის) და სხვა. ჩხიკვაძე არის სსრკ სახელმწიფო (1979), რუსთაველისა (1980) და მარჯანიშვილის (1975) პრემიების ლაურეატი. დაჯილდოებულია ლენინის ორდენით, "საპატიო ნიშნის" ორდენითა და მედლებით.
მსახიობი გარდაიცვალა 2011 წლის 17 ოქტომბერს თბილისში, 83 წლის ასაკში, მძიმე ავადმყოფობის შემდეგ. დაკრძალულია დიდუბის მწერალთა და საზოგადო მოღვაწეთა პანთეონში მეუღლის, ნატაშა ჩხიკვაძის, გვერდით.