პრეზიდენტი მთავრობას მოუწოდებს დაეხმაროს სოციალურად გაჭირვებულებს. მიხეილ სააკაშვილი რუსთავში სოციალურად დაუცველ ორ მრავალშვილიან ოჯახს ესტუმრა და დაინტერესდა, რატომ შეუწყდათ სოციალური დახმარება.
თავდაპირველად მიხეილ სააკაშვილი წულუკიძის ქუჩაზე მცხოვრებ ასანიძეების ექვსშვილიან ოჯახში მივიდა, შემდეგ კი ალიევების ხუთშვილიან ოჯახს ესტუმრა.
როგორც ასანიძეების ოჯახის დიასახლისმა განაცხადა, თებერვალში სახელმწიფოს მიერ გაცემული 198-ლარიანი სოციალური დახმარების გაცემა შეუჩერდა იმ მიზეზით, რომ ოჯახის უფროსმა კომპანია "გზატკეცილ +"-ში სამი კვირის განმავლობაში გზების მშენებლობაზე დროებით იმუშავა და პირად ანგარიშზე შრომითი ანაზღაურება 210 ლარის ოდენობით დაერიცხა.
"მთავრობა, რომელიც მოვიდა იმ ლოზუნგით, რომ დაეხმარებოდა სოციალურად გაჭირვებულებს და ჰყვებოდა, რომ თურმე მანამდე რომ ფული იხარჯებოდა გზატკეცილებში, რომელიც ადამიანებს ასაქმებდა, უნდა დახარჯულიყო სოციალურად გაჭირვებულებზე. ახლა აღარც დახმარებაა და აღარც გზატკეცილი. მინდა, მივმართო საქართველოს მთავრობას, ეს არ არის პოლიტიკური საკითხი, ეს არის ეროვნული საკითხი. ხალხს უნდა ჰქონდეს სოციალური დახმარება. ვარაუდობენ, რომ 25 ათას ოჯახს კიდევ ამოიღებენ სოციალურად დაუცველთა სიებიდან, ხელი როგორ არ უკანკალებთ იმათ, ვინც ამ ოჯახებს იღებენ სიიდან. მე მოვუწოდებ მთავრობას, მოვიდნენ ამ ოჯახებში", - განაცხადა სააკაშვილმა და ორივე ოჯახს პრეზიდენტის ფონდიდან დახმარებას დაჰპირდა.