საქართველოს პარლამენტის გენდერული თანასწორობის საბჭო 2013 წლის 8 თებერვალს განვითარებულ მოვლენებს ეხმიანება, რასაც ადგილი ჰქონდა როგორც ეროვნულ ბიბლიოთეკის, ისე პრეზიდენტის რეზიდენციის მიმდებარე ტერიტორიაზე და გმობს ყოველგვარ ძალადობრივ ქმედებას. საბჭო განსაკუთრებით გმობს ფიზიკურ ძალადობას პარლამენტის წევრ, ქალბატონ ჩიორა თაქთაქიშვილის და ნებისმიერი ქალბატონის მიმართ.
"საქართველოს პარლამენტის გენდერული თანასწორობის საბჭო არის ერთადერთი მუდმივმოქმედი ინსტიტუცია ქვეყანაში, რომელიც კონკრეტულად მიმართულია გენდერული თანასწორობის დაცვისაკენ. მისი ვალდებულებაა გენდერული თანასწორობის შესახებ კანონის, გენდერული თანასწორობის ეროვნული სამოქმედო გეგმისა და ეროვნული სამოქმედო გეგმის - ქალებზე, მშვიდობასა და უსაფრთხოებაზე (გაეროს რეზოლუცია 1325) შესრულება. აღმასრულებელ ხელისუფლებას ეკისრება ვალდებულება კანონმდებლობის შესაბამისად აღასრულოს ეს კანონი და სამოქმედო გეგმები და პრევენცია მოახდინოს ნებისმიერი ძალადობისა.
2013 წლის 8 თებერვალს ქალბატონი ჩიორა თაქთაქიშვილის მიმართ განხორციელებული ძალადობა არის ყველა ამ ნორმის უხეში დარღვევა და იწვევს საბჭოს განსაკუთრებულ შეშფოთებას. აღვნიშნავთ, რომ ქალბატონი ჩიორა წინა მოწვევის პარლამენტში იყო გენდერული თანასწორობის საბჭოს წევრი და გენდერული თანასწორობის კანონდმებლობის თანაავტორი. გენდერული თანასწორობის საბჭო მოუწოდებს სამართალდამცავ ორგანოებს უზრუნველყონ სამართალდამრღვევთა კანონშესაბამისი და ადეკვატური პასუხისმგებლობის საკითხის გადაწყვეტა"- ნათქვამია განცხადებაში.
საბჭოს ინფორმაციითვე, ძალადობა არ შეიძლება გახდეს პოლიტიკური პროცესის განმსაზღვრელი ნაწილი. გენდერული თანასწორობის საბჭო ემიჯნება ყოველგვარ ძალადობას და მოუწოდებს პოლიტიკური ჯგუფების ყველა წევრს, მიუხედევად მათი პოლიტიკური შეხედულებებისა, მშვიდობიანი, კანონშესაბამისი და დემოკრატიული გზებით გამოხატონ თავიანთი პოზიციები.