გადავდოთ პოლიტიკური მოტივები და ავაშენოთ ხიდი,- ასე გამოეხმაურა თბილისის მერი სამტრედიისა და მარშალ გელოვანის ქუჩების დამაკავშირებელი ე.წ. დაკიდული ხიდის მშენებლობის შეჩერების შესახებ მიღებულ გადაწყვეტილებას.
დედაქალაქის მერის თქმით, თბილისში საცობების შექმნის მოტივით ხიდის აშენებაზე მთავრობის უარი სასაცილოა. უგულავას მიაჩნია, რომ ქალაქის ურბანული განვითარებისთვის ვეფხისა და მოყმის ძეგლის მიმდებარე ტერიტორიაზე სამანქანო ხიდის აგება აუცილებელია. უგულავა მთავრობას ამ თემაზე კონსულტაციებს სთავაზობს.
დედაქალაქის მერი შერჩევით სამართალზეც საუბრობს. გიგი უგულავა აცხადებს, რომ "თბილსერვის ჯგუფის" საქმიანობის შესახებ ის საქმის კურსში იყო და კომპანიის ხელმძღვანელს მოსახლეობის დასაქმების შესახებ დავალებებს პირადად აძლევდა. პარალელურად, საგამოძიებო ორგანოებს გიგი უგულავა ბიძინა ივანიშვილის მფლობელობაში არსებული კომპანიების საქმიანობის შესწავლას სთხოვს, სადაც დედაქალაქის მერის განმარტებით, ათასობით "ქართული ოცნების" აქტივისტი იყო გაფორმებული.
"თბილსერვის ჯგუფის" საქმეზე საკრებულოს "ნაციონალური მოძრაობის" ფრაქციის რამდენიმე წევრია დაკითხული, მათ შორის ამავე თემაზე ჩვენება აქვს მიცემული თბილისის მერსაც.