მარშალ გელოვანის გამზირისა და სამტრედიის ქუჩის ერთმანეთთან დამაკავშირებელი ხიდის მშენებლობის შეწყვეტასთან დაკავშირებით თბილისის მერია განცხადებას ავრცელებს.
"მიმდინარე კვირას, მუნიციპალური განვითარების ფონდის მიერ, გავრცელებული ინფორმაციით, თბილისში მარშალ გელოვანის გამზირისა და სამტრედიის ქუჩის ერთმანეთთან დამაკავშირებელი ხიდი აღარ აშენდება. როგორც ცნობილია, მუნიციპალური განვითარების ფონდს არ ჰყავს მოძრაობის ორგანიზაციის სპეციალისტები. შესაბამისად წლების განმავლობაში, აღნიშნული პროექტის მომზადებაზე სხვადასხვა საპროექტო ორგანიზაციებთან ერთად, თბილისის მერიის საქალაქო სამსახურები მონაწილეობდნენ. შემუშავებული პროექტით გათვალისწინებული იქნა არა მხოლოდ ხიდის მშენებლობა, არამედ ხიდის მიმდებარე ქუჩებზე მოძრაობის სქემის მთლიანი შეცვლა.
მარშალ გელოვანის გამზირისა და სამტრედიის ქუჩის მიმდებარე ტერიტორია მდინარე მტკვარზე ერთადერთი მონაკვეთია, სადაც დიღმისა და ვახუშტის ხიდებს შორის დაშორება 3,5 კილომეტრს აღემატება. ხიდის არ არსებობის გამო, მოძრაობა გადატვირთულია ვეფხისა და მოყმის ძეგლის მიმდებარე ტერიტორიაზე, წერეთლის გამზირზე, ქუთაისისა და ვახუშტი ბაგრატიონის ქუჩებზე, ვახუშტი ბაგრატიონის ხიდზე, სააკაძის მოედანსა და მის მიმდებარე ქუჩებზე.
პროექტის განხორციელებით, ვეფხისა და მოყმის ძეგლთნ ხიდის მშენებლობასთან ერთად, მთლიანად შეიცვლებოდა მოძრაობის სქემა, გაუქმდებოდა შუქნიშანი და ავტოსატრანსპორტო საშუალებების გადაადგილება განხორციელდებოდა ორ დონეზე უწყვეტად, რაც ქალაქის ამ ნაწილში მნიშვნელოვნად განტვირთავდა მოძრაობას"- ნათქვამია განცხადებაში.