განათლების, მეცნიერებისა და კულტურის კომიტეტის სხდომაზე სახელმწიფო ,,პროფესიული თეატრების მართვის სისტემაში" ახალი რეგულაციების შემოღების თაობაზე იმსჯელეს.
პროექტით, სამხატვრო ხელმძღვანელი ეყოლება ყველა სახელმწიფო და მუნიციპალურ თეატრს, ხოლო მმართველის ფუნქციების ოპტიმიზაცია განხორციელდება სამხატრო ხელმძღვანელისა და დირექტორის უფლება-მოვალეობათა გამიჯვნით. თეატრის მართვას განახორციელებს სამხატვრო ხელმძღვანელი, რომელიც იქნება თეატრის საერთო ხელმძღვანელი და ძირითადი პასუხისმგებლობა დაეკისრება შემოქმედებით საქმიანობაზე, ხოლო დირექტორი იქნება ძირითადი პასუხისმგებელი ადმინისტრაციულ-ტექნიკურ და ორგანიზაციულ საქმიანობაზე.
იცვლება სამხატვრო ხელმძღვანელის თანამდებობაზე დანიშვნის წესიც - კერძოდ, მინისტრი სამხატვრო ხელმძღვანელს ნიშნავს თეატრალური სეზონის ვადით, მასთან არსებული სარეკომენდაციო საბჭოს მიერ შერჩეულ კანდიდატთაგან. სამხატვრო ხელმძღვანელის კანდიდატის საბჭოსთვის შეთავაზების უფლება ეძლევათ თეატრალურ დასებს, შემოქმედებით საზოგადოებებსა და ორგანიზაციებს. დირექტორს თანამდებობაზე წარადგენს თეატრის სამხატვრო ხელმძღვანელი.
განათლებისა და მეცნიერების მინისტრის მოადგილემ, დავით ზურაბიშვილმა კომიტეტის სხდომაზე პირველი მოსმენისთვის წარმოადგინა კანონპროექტი „ზოგადი განათლების შესახებ" კანონში ცვლილების შეტანის თაობაზე".
პროექტი ითვალისწინებს კანონმდებლობით გათვალისწინებული წესით სამეურვეო საბჭოს დათხოვნის ან უფლებამოსილების შეწყვეტის ან უფლებამოსილების განხორციელების შეუძლებლობას, აგრეთვე სამეურვეო საბჭოს ვერ არჩევის შემთხვევაში დირექტორის მიერ სამეურვეო საბჭოს უფლებამოსილების განხორციელების შესაძლებლობას, რაც თავის მხრივ უზრუნველყოფს საჯარო სკოლის მართვის შეუფერხებელ და ეფექტურ განხორციელებას.
ცვლილებების თანახმად, 2013 წლის თებერვლამდე მოქმედ საჯარო სკოლის სამეურვეო საბჭოს წევრებს უფლებამოსილება უგრძელდებათ 2013 წლის 1 ივნისამდე.
განათლების, მეცნიერებისა და კულტურის კომიტეტმა პირველი მოსმენისთვის განიხილა მთავრობის მიერ საკანონმდებლო ინიციატივის წესით წარმოდგენილი კანონპროექტის „საქართველოს სამოქალაქო კოდექსში ცვლილების შეტანის თაობაზე". კანონპროექტის მიხედვით, არასამეწარმეო (არაკომერციულ) იურიდიულ პირებს მიეცემათ შესაძლებლობა კანონმდებლობით დადგენილი წესით გარდაიქმნან საჯარო სამართლის იურიდიულ პირებად.
თავისუფალი სტუდენტისა და სასერტიფიკატო კურსის სტუდენტის მიერ მიღებული კრედიტების აღიარების სამართლებრივი მექანიზმის შექმნას ითვალისწინებს ფრაქცია „ერთიანი ნაციონალური მოძრაობის" მიერ საკანონმდებლო ინიციატივის წესით წარმოდგენილი კანონპროექტი „უმაღლესი განათლების შესახებ" კანონში ცვლილების შეტანის თაობაზე".
პროექტი კომიტეტის სხდომაზე პირველი მოსმენისთვის წარმოადგინა განათლების, მეცნიერების და კულტურის კომიტეტის თავმჯდომარის მოადგილემ, სერგო რატიანმა. ცვლილებების თანახმად, თავისუფალი მსმენელის, ან სასერტიფიკატო კურსის სტუდენტის მიერ მიღებული კრედიტები სტუდენტს ჩაეთვლება აკადემიური პროგრამის განვლილ ნაწილად, თუკი ისინი მიღებულია იმავე წესით, როგორც მას იღებენ აკადემიური საფეხურების სტუდენტები და თუკი გავლილი კურსები კონკრეტული აკადემიური პროგრამის შესაბამისია. ეს წესი იმოქმედებს იმ პირების მიმართ, ვინც ,,უმაღლესი განათლების შესახებ" კანონით დადგენილი წესით ჩაირიცხება უმაღლესი საგანმანათლებლო დაწესებულების აკადემიურ საგანმანათლებლო პროგრამაზე. განათლების, მეცნიერებისა და კულტურის კომიტეტმა მხარი დაუჭირა განხილული კანონპროექტების პლენარულ სხდომაზე გატანას.
