საქართველოს ტექნიკური უნივერსიტეტი განათლების მე-3 საერთაშორისო გამოფენაში მონაწილეობს. უნივერსიტეტის რვავე ფაკულტეტი, ასევე, სტუდენტური თვითმმართველობა, სტუდენტებთან, კურსდამთავრებულებთან ურთიერთობის, სპორტისა და კულტურის დეპარტამენტი გამოფენაზე თავიანთი მიღწევებით წარდგებიან.
15-16 თებერვალს გამოფენების ცენტრ "ექსპო-ჯორჯიას" მე-11 პავილიონში წარმოდგენილი იქნება უნივერსიტეტები, კოლეჯები და უმაღლესი სკოლები სხვადასხვა ქვეყნიდან, ესენია: ბრიტანეთი, თურქეთი, იტალია, კვიპროსი, ლატვია, ლიტვა, ჩეხეთი, პოლონეთი, მალაიზია, რუსეთი, უნგრეთი. საგამოფენო სტენდებზე მსოფლიოს სხვადასხვა ქვეყნიდან 100-მდე ორგანიზაცია იქნება წარმოდგენილი. გამოფენაზე წარმოდგენილი იქნება სახელმწიფო და კერძო უმაღლესი და პროფესიული სასწავლებლები, ასევე საერთაშორისო და დონორი ორგანიზაციები, რომელთა მიზანი საგანმანათლებლო სექტორის ხელშეწყობა და განვითარებაა.
გამოფენა წელს ორდღიანია (12-იდან 19 საათამდე), მასზე დასწრება თავისუფალია.
საქართველოს ტექნიკური უნივერსიტეტის წარმომადგენლები აბიტურიენტებს, მათ მშობლებსა და დაინტერესებულ პირებს მიაწვდიან სასურველი ინფორმაციას უნივერსიტეტის პროგრამებისა და სწავლის პირობების შესახებ.