თბილისის საკრებულოს ფრაქცია "ქართული ოცნება-დემოკრატიული საქართველოს" თავმჯდომარე ზაზა გაბუნიამ "თბილქალაქგანათების" ყოფილ გენერალურ დირექტორთან ამირან ქურცუასთან ერთად "მაესტროს პრეს-კლუბში" პრეს-კონფერენცია გამართა, სადაც გიგი უგულავას ახალ ფინანსურ მაქინაციაზე ისაუბრა.
დეპუტატის განცხადებით, სახეზეა "თბილსერვისჯგუფში" განხორციელებული ფინანსური მაქინაციური სქემის ანალოგი, რომლის ამოცანა ხელოვნურად გაზრდილი შტატების საშუალებით, მილიონობით ლარის აკუმულირება იყო.
ზაზა გაბუნიას თქმით, 2010 წელს ფორმალურად ჩატარებული ტენდერის შედეგად თბილისის გარე-განათების ქსელის ექსპლოატაცია-მოვლისთვის გაამარჯვებინეს შპს "სინათლის ქალაქს", რომელიც საკადრო თვალსაზრისით ნაციონალური მოძრაობის წევრებითა და აქტივისტებით დაკომპლექტდა და რომელსაც გადაეცა მისი წინამორბედი კომპანიის "თბილქალაქგანათების" ქონება და ფუნქცია. გაბუნია გარიგებით ჩატარებული აღნიშნული ტენდერის გამოძიებას ითხოვს.
"გათავისუფლებული იქნა ძველი კვალიფიციური კადრები და მათ ადგილზე დაინიშნენ ნაციონალური მოძრაობის წევრები, რომელთათვისაც საგანგებოდ შეიქმნა დამატებით 100 სხვადასხვა შტატი. არსებობს საფუძვლიანი ეჭვი, რომ დასაქმებული ადამიანები "სინათლის ქალაქში" არავითარ სამუშაოს არ ასრულებდნენ და მათი ძირითადი სამუშაო პარტიული დავალებების შესრულება იყო"- აცხადებს ზაზა გაბუნია.
ზაზა გაბუნიას მიერ ჟურნალისტებისთვის წარდგენილი დოკუმენტაციის მიხედვით ირკვევა, რომ შპს "სინათლის ქალაქის" სამეთვალყურეო საბჭოს წევრებად დაინიშნენ ყოფილი სპორტის მინისტრი ვლადიმერ ვარძელაშვილი, ყოფილი დეპუტატი კობა ხაბაზი, პარლამენტის ყოფილი თავმჯდომარის დავით ბაქრაძის მეუღლე, ქალბატონი მაკა მეტრეველი, იტალიაში საქართველოს ყოფილი ელჩი კოტე გაბაშვილი, პარლამენტის აპარატის ყოფილი უფროსი დავით ჯანიაშვილი და სხვა პირები, რომლებიც სოლიდურ გასამრჯელოს იღებდნენ ბიუჯეტიდან.
ზაზა გაბუნიას განცხადებით, მისი როგორც დედაქალაქის საკრებულოს წევრის ვალდებულებაა თბილისის აღმასრულებელი ხელისუფლების წარმომადგენელთა საქმიანობის მონიტორინგი. ზაზა გაბუნია: "თუმცა რამდენად არის ჩემს მიერ მოყვანილი ფაქტები დანაშაული და კანონის გადაცდომა, ამის შეფასებას საგამოძიებო ორგანოები გააკეთებენ". D
დეპუტატი გაბუნია გამოთქვამს იმედს, რომ საგამოძიებო სტრუქტურების მხრიდან ჩატარდება გამოძიება და მის მიერ მოყვანილ ფაქტებს, რომელიც კანონის დარღვევასა და დანაშაულზე მიუთითებს, მათი მხრიდან შესაბამისი კვალიფიკაცია მიეცემა.