„სახელმწიფო (აჭარის ავტონომიური რესპუბლიკის) საკუთრებაში არსებული უძრავი ქონების მოქალაქეთა მიერ თვითნებურად დაკავების ფაქტების შემსწავლელმა სამთავრობო კომისიამ" დაასრულა ხელვაჩაურის ტერიტორიაზე მდებარე 59-ე სამხედრო ბატალიონის ყოფილ შენობაში თვითნებურად შესახლებული მოსახლეობის აღწერა.
სამთავრობო კომისიამ 2 თვის განმავლობაში 763 თვითნებურად შესახლებული ოჯახის მდგომარეობა შეისწავლა. აქედან სოციალურად დაუცველ მოქალაქეთა ერთიან მონაცემთა ბაზაში 409 ოჯახი ფიქსირდება, 352 ოჯახი არ მიეკუთვნება სოციალურად დაუცველთა კატეგორიას, 24 ოჯახი საქართველოს სხვადასხვა რეგიონის მკვიდრია. თვითნებურად შესახლებულ ოჯახებს შორის, მხოლოდ 2 ეკომიგრანტი ოჯახი აღმოჩნდა. ერთ მათგანს უკვე გადაეცა ბინა შუახევის მუნიციპალიტეტში, მეორე ოჯახი ბინას ქედის მუნიციპალიტეტის ყოფილი საავადმყოფოს რეაბილიტირებულ შენობაში უახლოეს პერიოდში მიიღებს.
აჭარის ჯანდაცვის სამინისტროს ინფორმაციით, სახელმწიფო არ აპირებს სოციალურად დაუცველი, თავშესაფრის გარეშე დარჩენილი მოსახლეობის უყურადღებოდ დატოვებას. ამიტომ სამთავრობო კომისიის მიერ შესწავლილი ოჯახების მონაცემები შემდგომი რეაგირებისა და ინდივიდუალურად შესწავლის მიზნით გადაეგზავნა მუნიციპალიტეტების გამგეობებს და ქ. ბათუმის მერიას, რათა განიხილონ და ეტაპობრივად გადაწყვიტონ მათი პრობლემები.
„მოსახლეობის მიერ თვითნებურად დაკავებული ტერიტორია და უძრავი ქონება წარმოადგენს სახელმწიფო საკუთრებას, მისი განკარგვა განხორციელდება სამრეწველო ზონის განვითების შესაბამისად. ამიტომ აქ მყოფ ოჯახებს ტერიტორიის დასატოვებლად ვადა აპრილის დასაწყისამდე ეძლევა, ამის შემდეგ გატარდება კანონით გათვალისწინებული ღონისძიებები.
უახლოეს პერიოდში აჭარის მთავრობა ბინას ქედის მუნიციპალიტეტში 42 ოჯახს გადასცემს. მალე დასრულდება ეკომიგრანტებისთვის სოციალური სახლების მშენებლობა თამარის დასახლებაში. მიმდინარე წლის იანვარში კი შუახევის მუნიციპალიტეტში ბინა 33 სოციალურად დაუცველმა ეკომიგრანტმა ოჯახმა მიიღო.
ასევე დაწყებულია მიწისძვრის შედეგად დაზარალებული 24 ოჯახისთვის ბინის ქირისათვის თანხის (300 ლარის ოდენობით 6 თვის განმავლობაში) გამოყოფა. სამთავრობო კომისია უკვე მუშაობს მიწისძვრის შედეგად დაზარალებული ოჯახების ზარალის დადგენისათვის საჭირო კრიტერიუმებზე. იგეგმება სახლების გამაგრებითი სამუშაოების ჩატარება, აღდგენა ან ალტერნატიული ფართის გამოყოფა"- განმარტავენ სამინისტროში.
მასალის გამოყენების პირობები
