გორში, დევნილებისთვის გარემონტებულ ყოფილ ისტორიუილი ბაღის შენობას ისევ ბაღის სტატუსი დაუბრუნდება და სასწავლო პროცესი განახლდება. აღნიშნული ინფორმაციით ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ ბავშვები, მათი მშობლები და პედაგოგები დღეს გაახარა.
ყოფილი მთავრობის გადაწყვეტილებით, გორის ყოფილ მე-9-ე, ისტორიულ ბაღს ფუნქცია ჩამოერთვა და ის დევნილი მოსალხეობის შესასახლებლად გარემონტდა. ახალმა ხელისუფლებამ მშობლების, მასწავლებელებისა და საზოგადოების თხოვნა ბაღის დაბრუნების შესახებ გაითვალისწინა და ყოფილ ბაღს ფუნქცია დაუბრუნა.
დღეს მინისტრი დავით დარახველიძე მაჟორიტარ დეპუტატთან და გამგებელთან ერთად საბავშვო ბაღის ყოფილ თანამშრომლებს, ბავშვებსა და მათ მშობლებს შეხვდა, აღნიშნული გადაწყვეტილების შესახებ ინფორმაცია მიაწოდა და გარემონტებული ოთახების გასაღები გადასცა.
მშობლები ბაღში ბავშვებთან ერთად მივიდნენ და ემოციებს ვერ მალავდნენ.
ზეინაბ კრიხელი, მშობელი: „3 ბავშვი ამ ბაღში გავზადრე და მეოთხე ბავშვის მოყვანასაც აქ ვაპირებდი, მაგრამ ბაღი გაგვიუქმეს. ახლა გავიგე, რომ თურმე დევნილთა სამინისტრომ ბაღი უკან დაგვიბრუნა, უბედნიერესი ადამიანი ვარ, ცრემლებს ვერ ვიკავებ და მეტირება. ასეთი სასიკეთო საქმე ჯერ არ მახსოვს. ბავშვებს ბაღი დაუბრუნდათ, რაც ბავშვებისთვის, მშობლებისთვის და ბაღის თანამშრომლებისთვის უდიდესი ბედნიუერებაა. 60 წელია ეს ბაღი არსებობს და რატომ ჩამოგვართვეს და რატომ გაუუქმეს ბაღის ფუნქცია გაუგებარი იყო. რაც მთავარია, ჩვენი გულისტკივილი გაიზიარეს და ბაღი დავიბრუნეთ, თანაც გარემონტებული. ძალიან ძვირფასი ბაღი იყო და მინისტრის ინფორმაციამ ძალიან გაგვახარა."
ელიკო ნაცლიშვილი, ბაღის ყოფილი თანამშრომელია: „30 წელზე მეტია, ამ ბაღში ვმუშაობდი. სიხარულისგან ემოციებს ვეღარ ვმალავ. ლამის გავგიჟდე. ეს რა სიკეთე გაგვიკეთა მინისტრმა. ამ ეზოში თითოეულ ხეს ვუვლიდი და მოულოდნელად წაგვართვეს. დღეს ძალიან კარგი საქმე გაკეთდა და მადლიერებას გამოვხატავთ."
საბავშვო ბაღის აღსაზრდელებმა ბაღის ეზოში ითამაშეს კიდეც. მინისტრმა კი აღნიშნა, რომ ბაღის ბავშვებისთვის დაბრუნებით დევნილები არ დაზარალდებიან: „წინა ხელისუფლებამ ეს მშვენიერი ისტორიული ბაღი თავისი ეზოთი და ასწლოვანი ნარგავებით ჩამოართვა ბავშვებს და გაუქმდა ბაღი. შემდეგ, სამინისტრომ შენობას ჩაუტარა რეაბილიტაცია და აქ უნდა ეცხოვრათ დევნილებს, მაგრამ გორის საზოგადოების, მშობლებისა და მასწავლებლების თხოვნა იყო, ამ შენობას დაბრუნებოდა ბაღის ფუნქცია. ჩვენ გავიზიარეთ ეს მოსაზრება და ბაღი დავუბრუნეთ ბავშვებს. ამით დევნილები არ დაზარალდებიან, რადგან მუნიციპალიტეტმა დევნილებისთვის გადმოგვცა ალტერნატიული ფართი."
