დღეს, 2 თებერვალს, დასრულდება საქართველოს თავდაცვის სამინისტროს დელეგაციის ოფიციალური ვიზიტი ნატოს შტაბ-ბინაში. საქართველოს თავდაცვის მინისტრის პირველი მოადგილე ლევან დოლიძე ოფიციალური ვიზიტით ბრიუსელში 31 იანვარს გაემგზავრა. მასთან ერთად ნატოს შტაბ-ბინაში საქართველოს შეიარაღებული ძალების გაერთიანებული შტაბის უფროსის მოადგილე, ბრიგადის გენერალი ვახტანგ კაპანაძე იმყოფებოდა.
სამდღიანი ვიზიტის ფარგლებში, თავდაცვის სამინისტროს დელეგაციის წევრები შეხვედრები გამართეს ნატოს გენერალური მდივნის მოადგილესთან ალექსანდრე ვერშბოუსთან, ნატოს სპეციალურ წარმომადგენელთან სამხრეთ კავკასიასა და ცენტრალურ აზიაში ჯეიმს აპატურაისთან, ნატოს თავდაცვის პოლიტიკისა და დაგეგმვის დირექტორთან ფრენკ ბოლანდთან და ნატოს გენერალური მდივნის თანაშემწესთან თავდაცვის პოლიტიკისა და დაგეგმვის საკითხებში ჰუსეინ დირიოზთან. დაგეგმილია ასევე, ორმხრივი შეხვედრები ბალტიისპირეთის ქვეყნების, პოლონეთისა და რუმინეთის ელჩებთან.
1-ელ თებერვალს საქართველოს დელეგაცია ლევან დოლიძის ხელმძღვანელობით, საერთაშორისო სამხედრო შტაბის თანამშრომლობისა და რეგიონალური უსაფრთხოების განყოფილების დირექტორთან გენერალ-მაიორ კარლოს ბრანკოს შეხვდნენ. ასევე, საქართველოს თავდაცვის სამინისტროს დელეგაციის წევრები დაგეგმვისა და მიმოხილვის პროცესის (PARP) შეფასებაშიც მიიღეს მონაწილეობა. საქართველო ამ პროცესში 1999 წლიდან მონაწილეობს. ალიანსთან პარტნიორობის მექანიზმი პრაქტიკულ ინსტრუმენტს წარმოადგენს, რომლის საშუალებითაც ხდება პარტნიორი ქვეყნის სამხედრო ქვედანაყოფების, ასევე მართვის სისტემების ნატოს ძალებთან თავსებადობის მიღწევა.