დუშეთის სამედიცინო ცენტრში მშობიარობის შემდეგ 16 წლის გოგონა გარდაიცვალა. დაღუპულის ოჯახის წევრები ექიმ - გინეკოლოგ ირმა მაკალათიას ადანაშაულებენ და მის წინააღმდეგ ჯანდაცვის სამინისტროსგან რეაგირებას ითხოვენ.
როგორც მცხეთა - მთიანეთის საინფორმაციო ცენტრს დუშეთის სამედიცინო ცენტრის მენეჯერმა მედეა პატაშურმა განუცხადა, გოგონამ 27 იანვარს იმშობიარა, რის შემდეგაც ის მცხეთის სამედიცინო ცენტრში გადაიყვანეს, სადაც გარდაიცვალა.
„გოგონამ ფიზიოლოგიურად 27 იანვარს იმშობიარა. არანაირი ინსტრუმენტული ჩარევა არ ყოფილა, მშობიარობა ნორმალურად დამთავრდა. მეორე დღეს პაციენტის მდგომარეობა გაუარესდა, მუცელი შეებერა და არტერიული წნევა დაეცა. სასწრაფოდ გამოვიძახეთ კატასტროფის მედიცინის ცენტრის ბრიგადა და დიაგნოზის დაზუსტების მიზნით, მცხეთის საავაადმყოფოში გადაიყვანეს. მცხეთაში მას ოპერაცია ჩაუტარდა, გაიხსნა მუცლის ღრუ და საშვილოსნო იქნა ამპუტირებული, მაგრამ მე როგორც ვიცი, საშვილოსნო დაზიანებული არ იყო. მისი გარდაცვალების ზუსტ მიზეზს ექსპერტიზა დაადგენს. ახალშობილის ჯანმრთელობის მდგომარეობა დამაკმაყოფილებელია", -აღნიშნა მედეა პატაშურმა.
მცხეთის სამედიცინო ცენტრში განმარტეს, რომ პაციენტი სტაციონარში ჯანმრთელობის მძიმე მდგომარეობით მოათავსეს.
